प्रहरीले अगाडि बढायो कारबाही, प्रसाईंमाथि अनुसन्धानका लागि चार दिनको म्याद थप

काठमाडौं । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’का संयोजक दुर्गा प्रसाईं माथि अनुसन्धानका लागि जिल्ला प्रशासन कार्यालय काठमाडौंले चार दिनको म्याद थप गरेको छ।

प्रसाईंलाई सोमबार भक्तपुरस्थित आफ्नै निवासबाट पक्राउ गरेर जिल्ला प्रहरी परिसर काठमाडौंले मंगलबार प्रशासनमा उपस्थित गराएको हो। सार्वजनिक शान्ति भंग हुने किसिमका गतिविधि र निर्वाचनसम्बन्धी अफवाह फैलाएको आरोपमा उनलाई नियन्त्रणमा लिइएको प्रहरीले जनाएको छ।

परिसरका प्रवक्ता प्रहरी उपरीक्षक पवनकुमार भट्टराईका अनुसार प्रसाईंविरुद्ध सार्वजनिक शान्तिविरुद्धको कसुरअन्तर्गत अनुसन्धान अगाडि बढाइएको छ। सोही आधारमा थप अनुसन्धानका लागि अदालतबाट म्याद प्राप्त भएको हो।

प्रसाईंले फागुन २१ मा निर्वाचन नहुने दाबी गर्दै सार्वजनिक अभिव्यक्ति दिएका हुन् । यसअघि पनि उनी विभिन्न मुद्दामा पटक–पटक पक्राउ परेका छन् । केही दिनअघि वीरगञ्ज जाँदै गर्दा दक्षिणकाली क्षेत्रबाट एकपटक नियन्त्रणमा परे भने, त्यसअघि पोखराबाट पनि पक्राउ परेका हुन् ।

प्रहरीले घटनासम्बन्धी थप अनुसन्धान जारी रहेको जानकारी दिएको हो। आवश्यक प्रक्रिया पूरा भएपछि थप जानकारी सार्वजनिक गरिने बताइएको छ।