आगजनी गर्ने जेनजी होइनन्, देशद्रोही र अपराधी हुन् :ओली

काठमाडौं ।  नेकपा (एमाले) का अध्यक्ष केपी शर्मा ओलीले भदौ २४ गते भएको आगजनी घटनामा संलग्न व्यक्तिहरूलाई देशद्रोही र अपराधीको संज्ञा दिएका छन् । उनले ती व्यक्ति आन्दोलनकारी नभएको स्पष्ट पारेका छन् ।

बुधबार भूतपूर्व सैनिक तथा प्रहरी संगठनको स्थापना दिवस समारोहलाई सम्बोधन गर्दै अध्यक्ष ओलीले आगजनी पूर्वनियोजित रहेको दाबी गरे ।

‘भदौ २४ को घटना तत्काल उत्पन्न भएको होइन, आठ–दश वर्षदेखि गरिएको तयारीको परिणाम हो,’ उनले भने, ‘देश जलाउनेहरू आन्दोलनकारी होइनन्, उनीहरू देशद्रोही र अपराधी हुन्।’ओलीले उक्त घटनालाई जेनजी आन्दोलनसँग जोडेर फैलाइएको भ्रमप्रति पनि आपत्ति जनाए । ‘मैले जेनजीलाई भनेको होइन, उनीहरूले देश जलाएका होइनन्,’ उनले स्पष्ट पारे।

उनका अनुसार जेनजी आन्दोलनमा घुसपैठ गरी नियोजित रूपमा आगजनी र तोडफोड गरिएको हो। ‘आत्मा बेचिएका तत्वहरूले देश जलाउने काम गरेका छन्,’ उनले भने भदौ २४ गते भएको आगजनी साधारण मानिसले नगरेको ओलीको दाबी छ । ‘खोजी–खोजी त्यही ठाउँमा आगो लगाइयो, जहाँ विशेष व्यक्तिका फाइल थिए । यो सामान्य घटना होइन,’ उनले बताए।

उक्त घटना बिर्सन नसकिने भन्दै ओलीले अब त्यसबाट पाठ सिकेर देश निर्माणतर्फ अघि बढ्नुका साथै उनले देश निर्माणको नेतृत्व नेकपा (एमाले) ले गर्ने दाबी समेत गरेका छन् ।