कांग्रेस केन्द्रीय समितिको बैठक सुरु, विभिन्न ११ प्रस्तावमाथि छलफल जारी

काठमाडौं । नेपाली कांग्रेस केन्द्रीय कार्यसमितिको बैठक आज ललितपुरस्थित बी.पी. स्मृति भवनमा सभापति गगनकुमार थापाको सभापतित्वमा बसेको छ।

बैठकको प्रारम्भमा सभापति थापाले मन्तव्य राख्दै समसामयिक राजनीतिक विषय, सुशासन, संगठन सुदृढीकरण र आगामी कार्यक्रमबारे गम्भीर छलफल आवश्यक रहेको बताएका छन् । त्यसपछि महामन्त्री प्रदीप पौडेलले ११ वटा प्रस्ताव बैठकमा प्रस्तुत गरेका हुन् ।

प्रस्तावहरूमा समसामयिक विषय, सुशासन प्रवर्द्धन, संविधान संशोधन अध्ययनका लागि विज्ञ समिति गठन, १५औँ महाधिवेशनको कार्यतालिका निर्धारण, केन्द्रीय निर्वाचन समिति गठन, प्रतिनिधिसभा सदस्य अभिमुखीकरण, क्रियाशील सदस्यता अभियान, प्रदेश तथा स्थानीय सरकारको समीक्षा, भ्रातृ तथा शुभेच्छुक संस्थासम्बन्धी विषय, केन्द्रीय लेखा समिति गठन तथा विविध विषय समेटिएका छन्।

बैठकमा २८ जना केन्द्रीय सदस्य तथा प्रदेश सभापतिहरूले आ–आफ्नो धारणा राखेका छन्। धारणा राख्ने क्रम जारी रहेकाले बैठक भोलि चैत्र ११ गते बिहान ११ बजे पुनः बस्ने जानकारी गराएको छ।