काठमाडौंमा दिउँसो ३ बजेसम्म ३ लाख ६० हजारभन्दा बढी मतदान

काठमाडौं । प्रतिनिधिसभा सदस्य निर्वाचनअन्तर्गत राजधानी काठमाडौंमा मतदान उत्साहजनक देखिएको छ। आज दिउँसो ३ बजेसम्म जिल्लाभर ३ लाख ६० हजार ८७१ मत खसेको निर्वाचन कार्यालयले जनाएको छ।

प्राप्त विवरणअनुसार मतदान गर्नेहरूमध्ये १ लाख ८७ हजार ३७६ महिला, १ लाख ७३ हजार ४९२ पुरुष तथा ३ जना अन्य मतदाता रहेका छन्। हालसम्मको तथ्यांकले मतदानमा महिलाको सहभागिता पुरुषभन्दा केही बढी देखिएको हो।

काठमाडौंमा कुल करिब ७ लाख १० हजार मतदाता रहेका छन्। १० वटा प्रतिनिधिसभा निर्वाचन क्षेत्र रहेको जिल्लाका सबै मतदान केन्द्रमा हालसम्म मतदान शान्तिपूर्ण रूपमा जारी रहेको जानकारी दिएको छ।

देशभर प्रतिनिधिसभा सदस्य चयनका लागि बिहान ७ बजेदेखि मतदान सुरु भएको हो, जुन साँझसम्म जारी रहनेछ।