कोलम्बियामा सैन्य विमान दुर्घटना : ज्यान गुमाउनेको संख्या ६६ पुग्यो

काठमाडौं । कोलम्बियाको अमेजन क्षेत्र नजिक भएको सैन्य विमान दुर्घटनाले देशभर शोकको वातावरण सिर्जना गरेको छ।

पोर्टो लेगुइजामो नजिकै उडेको केही समयमै दुर्घटनाग्रस्त भएको विमानमा सवारमध्ये कम्तीमा ६६ जनाको मृत्यु भएको पुष्टि भएको छ भने दर्जनौँ घाइते भएका छन्।

सैन्य अधिकारीका अनुसार विमानमा ११५ सैनिक, ११ चालक दलका सदस्य र दुई प्रहरी सवार थिए। दुर्घटनापछि ५७ जनालाई जीवितै उद्धार गरिएको जनाइएको छ भने केही अझै बेपत्ता रहेका छन्।

प्रारम्भिक अनुसन्धानले दुर्घटना कुनै आक्रमणका कारण नभई प्राविधिक समस्यासँग सम्बन्धित हुन सक्ने देखाएको छ। विमान उडानपछि छोटो समयमै समस्या देखिएर विमानस्थलबाट करिब दुई किलोमिटर टाढा खसेको बताइएको छ।

दुर्गम क्षेत्र भएकाले उद्धार कार्यमा स्थानीय बासिन्दाले महत्वपूर्ण सहयोग गरेका छन्। घाइतेहरूलाई प्राथमिक उपचारपछि राजधानी बोगोटा लगायतका अस्पतालमा पठाइएको छ।

यस घटनापछि सरकारले सैन्य उपकरणको अवस्था, उडान सुरक्षा र पूर्वाधार सुधारको आवश्यकता पुनः उठाएको छ।विशेषज्ञहरूले दुर्घटनाको वास्तविक कारण पत्ता लगाउन विस्तृत अनुसन्धान आवश्यक रहेको बताएका छन्।

यो दुर्घटनाले कोलम्बियाको सुरक्षा संयन्त्र र सैन्य तयारीमाथि गम्भीर प्रश्न खडा गरेको छ भने देश शोकमा डुबेको छ।