चोरीका ६० दुई पाङ्ग्रे सवारी ट्राफिक प्रहरीद्वारा धनीलाई फिर्ता

काठमाडौं । उपत्यका काठमाडौं ट्राफिक प्रहरी कार्यालयले विभिन्न समयमा चोरी भएका ६० वटा दुई पाङ्ग्रे सवारीसाधन फेला पारेर आज सम्बन्धित सवारीधनीलाई फिर्ता गरेको छ।

उपत्यका प्रहरी कार्यालयमा आयोजित कार्यक्रममा प्रहरी अतिरिक्त महानिरीक्षक ईश्वर कार्की र उपत्यका ट्राफिक प्रहरी प्रमुख प्रहरी वरिष्ठ उपरीक्षक नवराज अधिकारीले संयुक्त रूपमा ३४ वटा मोटरसाइकल र २६ वटा स्कुटर धनीलाई हस्तान्तरण गरेका छन् ।

ट्राफिक प्रहरी प्रमुख अधिकारीका अनुसार, आज हस्तान्तरण गरिएका सवारीसहित गत साउनयता चोरी भएका कुल १८१ वटा दुई पाङ्ग्रे सवारीसाधन धनीलाई फिर्ता गरिएको हो ।

यस अवधिमा चोरीमा संलग्न २५ जनालाई नियन्त्रणमा लिएर आवश्यक कारबाहीका लागि सम्बन्धित प्रहरी वृत्त तथा परिसरमा पठाइएको प्रहरीले जनाएको छ।

ट्राफिक प्रहरी कार्यालयका अनुसार चालु आर्थिक वर्षमा ४१७ वटा र आर्थिक वर्ष २०८१/८२ मा ५०३ वटा दुई पाङ्ग्रे सवारीसाधन फेला पारेर सवारीधनीलाई बुझाइसकिएको छ।

सवारी हराएमा तत्काल १०३ (उपत्यका ट्राफिक प्रहरी) वा १०० (नेपाल प्रहरी) नम्बरमा सम्पर्क गरी नजिकको प्रहरी कार्यालयमा निवेदन दिन ट्राफिक प्रहरीले अनुरोध गरेको छ।