जेनजी आन्दोलनको क्षति प्रतिवेदन सार्वजनिकः २३ करोडभन्दा बढी नगद जलेर नष्ट, चोरीबाट ३२ करोड क्षति

काठमाडौं । २३ र २४ भदौमा भएको जेनजी आन्दोलनका क्रममा साढे २३ करोड रुपैयाँभन्दा बढी नगद नोट जलेर नष्ट भएको तथ्य सार्वजनिक भएको छ ।

अन्तरिम सरकारले गठन गरेको क्षति मूल्यांकन तथा सार्वजनिक संरचना पुनर्निर्माण योजना तयारी समितिको प्रतिवेदन (२०८२) ले आन्दोलनबाट भएको कुल आर्थिक क्षति २ अर्ब ८१ करोड ३४ लाख रुपैयाँ पुगेको जनाएको छ ।

प्रतिवेदनअनुसार कुल क्षतिमध्ये ५७.५ प्रतिशत चोरी, ३०.९ प्रतिशत आगजनी र ११.६ प्रतिशत तोडफोड का कारण भएको हो । आन्दोलनका क्रममा नगदतर्फ कुल ७८ करोड रुपैयाँभन्दा बढी क्षति पुगेकोमा २३ करोड ६९ लाख रुपैयाँ बराबरको नगद जलेर नष्ट भएको उल्लेख गरिएको छ ।

चोरीका कारण मात्रै ३२ करोड ८१ लाख रुपैयाँ बराबरको नगद क्षति भएको प्रतिवेदनमा जनाइएको छ भने तोडफोडबाट नगदतर्फ करिब २२ करोड रुपैयाँ बराबरको क्षति पुगेको छ ।

बहुमूल्य वस्तुमा ठूलो क्षति
सुन, चाँदी, हिरा, मोतीजस्ता बहुमूल्य धातु तथा गरगहनामा १ अर्ब २ करोड ६४ लाख रुपैयाँ बराबरको क्षति चोरीबाट भएको देखिएको छ । यस्तै आगजनीबाट १३ करोड ११ लाख र तोडफोडबाट ९३ लाख रुपैयाँ बराबरको क्षति पुगेको प्रतिवेदनमा उल्लेख छ ।

निजी प्रतिष्ठान र घरपरिवार बढी प्रभावित
निजी प्रतिष्ठानमा रहेको नगद तथा सुनचाँदीलगायत बहुमूल्य वस्तुमा ५६ करोड १८ लाख रुपैयाँ बराबरको क्षति भएको छ, जुन निजी प्रतिष्ठानहरूले व्यहोरेको कुल क्षतिको २.६ प्रतिशत हो ।

घरपरिवारतर्फ हेर्दा सुन, चाँदी, हिरा र मोतीमा ७५ करोड ३१ लाख रुपैयाँ, नगदमा १२ करोड ६५ लाख रुपैयाँ र अन्य बहुमूल्य वस्तुमा ७ करोड ५८ लाख रुपैयाँ बराबरको क्षति भएको प्रतिवेदनले देखाएको छ ।

प्रमुख कारण
प्रतिवेदनले जेनजी आन्दोलनका क्रममा भएको नगद तथा बहुमूल्य वस्तुमा क्षतिको मुख्य कारण चोरी नै रहेको निष्कर्ष निकालेको छ। आगजनी र तोडफोडको तुलनामा चोरीबाट भएको क्षति उल्लेखनीय रूपमा बढी देखिएको छ ।

समितिको प्रतिवेदनले जेनजी आन्दोलनका क्रममा भएको क्षतिमा चोरी, आगजनी र तोडफोडका घटनाले ठूलो असर पारेको देखाएको छ। सरकारका अनुसार क्षतिको यथार्थ विवरणका आधारमा पुनर्निर्माण र क्षतिपूर्ति सम्बन्धी आगामी नीति तथा कार्यक्रम तय गरिनेछ ।