झापामा बर्ड फ्लु फैलियो, कुखुरा–अण्डा ओसारपसारमा पूर्ण प्रतिबन्ध

काठमाडौं । झापामा ‘बर्ड फ्लु’ पुष्टि भएपछि प्रशासनले पक्षीजन्य वस्तुको ओसारपसारमा कडाइ गरेको छ।

दमक नगरपालिका र झापा गाउँपालिकामा व्यावसायिक रूपमा पालिएका कुखुरामा संक्रमण देखिएपछि उच्च सतर्कता अपनाइएको हो।

मंगलबार संक्रमण देखिएका क्षेत्रलाई केन्द्र मानेर चारै दिशामा सङ्कटग्रस्त क्षेत्र घोषणा गरिएको छ। कुखुरा, अण्डा, दाना तथा अन्य पक्षीजन्य सामग्री एक स्थानबाट अर्को स्थानमा लैजान पूर्ण रूपमा रोक लगाइएको प्रशासनले जनाएको छ।

भेटेरिनरी अस्पतालका अनुसार आज दमक–१० स्थित एक फार्ममा ‘हाइप्याथोजेनिक’ बर्ड फ्लु पुष्टि भएपछि त्यहाँका सबै कुखुरा नष्ट गरिएको छ। संक्रमण थप नफैलियोस् भनेर निगरानी तथा परीक्षण कार्य जारी रहेको बताइएको छ।

छिमेकी जिल्ला मोरङ र सुनसरीमा समेत संक्रमणको जोखिम देखिन थालेकाले अवस्था थप संवेदनशील बनेको हो। नमूनाहरूको परीक्षणका लागि प्रयोगशालामा पठाइएको छ।

प्रशासनले रोग फैलिन नदिन कडाइका साथ निगरानी बढाउँदै किसानलाई आवश्यक सतर्कता अपनाउन आग्रह समेत गरेको छ।