डोटीमा बिहान ११ बजेदेखि मतगणना सुरु हुने

काठमाडौं। प्रतिनिधिसभा सदस्य निर्वाचनको मतदान सम्पन्न भएपछि डोटीमा मतगणनाको तयारी पूरा भएको छ। सर्वदलीय बैठकको निर्णयअनुसार शुक्रबार बिहान ११ बजेदेखि मतगणना सुरु गर्ने तय गरिएको छ।

मुख्य निर्वाचन अधिकृतको कार्यालयमा बसेको बैठकले मतगणना प्रक्रिया अघि बढाउने सहमति गरेको हो। जिल्लाभरका सबै मतदान केन्द्रबाट मतपेटिका संकलन भइसकेपछि गणना सुरु गर्न लागिएको मुख्य निर्वाचन अधिकृत पदमराज पाण्डेयले जानकारी दिए।

यस निर्वाचनमा डोटीमा ४०.८८ प्रतिशत मतदान भएको छ। मुख्य निर्वाचन अधिकृतको कार्यालयका अनुसार जिल्लाभर ५२ हजार ४ सय ८५ मत खसेको छ। मतदान गर्नेहरूमध्ये ३१ हजार ९ सय २ महिला र २० हजार ५ सय ८३ पुरुष रहेको जिल्ला निर्वाचन अधिकारी करूणाकर पन्तले बताएका छन्।

मतगणना सुरु भएसँगै अब डोटीका उम्मेदवारहरूको राजनीतिक भविष्य मतपेटिकाभित्रबाट तय हुने छ।