त्रिभुवन विमानस्थलमा ११ किलोभन्दा बढी गाँजासहित ३ जना भारतीय नागरिक पक्राउ

काठमाडौं । त्रिभुवन अन्तर्राष्ट्रिय विमानस्थलको आगमन टनेल गेटबाट करिब ११ किलो २७० ग्राम अवैध लागुऔषध गाँजासहित तीन जना भारतीय नागरिक पक्राउ परेका छन्।

शुक्रबार पक्राउ पर्नेहरूमा ४३ वर्षीया समीना अख्तर बेग मिर्जा, २४ वर्षीय मोहम्मद जुनैद, र ४४ वर्षीय अफसाना अमीर हुसेन शेख रहेका छन्।

केन्द्रीय प्रहरी प्रवक्ता एवम् प्रहरी नायब महानिरीक्षक अविनारायण काफ्लेका अनुसार, मोहम्मद जुनैद र समीना अख्तर बेग मिर्जाबाट करिब ३ किलो ८७० ग्राम र अफसानाबाट करिब ७ किलो ४०० ग्राम गाँजा बरामद गरेको हो।

तीनै जनालाई आवश्यक अनुसन्धान र कारबाहीका लागि  लागुऔषध नियन्त्रण ब्यूरो पठाइएको प्रहरीले बताएको छ ।

उक्त विषयको प्रारम्भिक अनुसन्धान जारी छ र थप विवरण आउने बितिकै सार्वजनिक गरिने जानकारी दिएको छ।