थाइल्यान्डमा प्रशिक्षण उडान दुर्घटना, दुई सैन्य पाइलटको ज्यान गयो

काठमाडौँ । थाइल्यान्डको उत्तरी क्षेत्र चियाङ माई प्रान्तमा सैन्य प्रशिक्षणका क्रममा भएको विमान दुर्घटनामा दुई जना पाइलटको मृत्यु भएको छ।

रोयल थाई एयर फोर्स (आरटीएएफ) ले बिहीबार उक्त दुर्घटनाबारे औपचारिक जानकारी दिएको हो।

आरटीएएफका अनुसार विङ–४१ अन्तर्गतको एटी–६ टीएच प्रकारको प्रशिक्षण विमान चियाङ माई अन्तर्राष्ट्रिय विमानस्थलबाट करिब ६० किलोमिटर दक्षिणपश्चिममा पर्ने चोम थोङ जिल्लामा स्थानीय समयअनुसार बिहान करिब १०ः२० बजे दुर्घटनाग्रस्त भएको हो।

दुर्घटनाका बेला पाइलटहरू लडाइँ खोज तथा उद्धारसम्बन्धी अभ्यासमा संलग्न रहेको पुष्टि गरिएको छ।

वायुसेनाका प्रवक्ता चकरित थम्माभिचाईका अनुसार घटनास्थल आसपासमा कुनै पनि नागरिक हताहत वा भौतिक क्षति भएको विवरण प्राप्त भएको छैन।

वायुसेनाले दुर्घटनाको वास्तविक कारण पत्ता लगाउन उड्डयन सुरक्षासम्बन्धी मापदण्डअनुसार विस्तृत अनुसन्धान अघि बढाइने जानकारी गराएको छ।

साथै, दुर्घटनामा ज्यान गुमाएका पाइलटको परिवारप्रति गहिरो समवेदना व्यक्त गर्दै आवश्यक सहयोग उपलब्ध गराइने पनि आरटीएएफले स्पष्ट पारेको छ।