आज देखी देशभर किशोरीलाई एचपीभी खोप अभियान

काठमाडौं । पाठेघरको मुखको क्यान्सर रोकथामका लागि नेपालभर किशोरी लक्षित एचपीभी (ह्युमन पापिलोमा भाइरस) खोप अभियान सञ्चालन गरिँदै छ।

आज स्वास्थ्य तथा जनसंख्या मन्त्रालयको समन्वयमा कक्षा ६ मा अध्ययनरत छात्रा र विद्यालय नजाने १० वर्ष उमेरका किशोरीलाई प्राथमिकतामा राखेर खोप लगाइने भएको हो।

देशभरका विद्यालय र समुदायमा तोकिएका खोप केन्द्रमार्फत अभियान सञ्चालन गरिनेछ। यसअन्तर्गत यसअघि खोप लगाउन छुट भएका कक्षा ६ देखि १० सम्म अध्ययनरत किशोरी तथा विद्यालय नजाने १० देखि १४ वर्ष उमेर समूहका किशोरीलाई पनि समेटिने जनाइएको छ।

स्वास्थ्य निकायका अनुसार एचपीभी खोप पूर्ण रूपमा सुरक्षित र प्रभावकारी भएकाले कुनै भ्रममा नपरी निर्धक्क भएर लगाउन आग्रह गरिएको छ। अभियान सफल बनाउन स्वास्थ्यकर्मी, स्वयंसेवक तथा स्थानीय तहको सक्रिय सहभागिता रहनेछ।

महिलाको शारीरिक तथा प्रजनन स्वास्थ्यसँग प्रत्यक्ष जोडिएको यो अभियानलाई राष्ट्रिय प्राथमिकतामा राखेर अघि बढाइएको बताइएको छ। खोपबाट कोही पनि वञ्चित नहोस् भन्ने उद्देश्यले छुटेकालाई थप समय दिएर समावेश गर्ने तयारीसमेत गरिएको छ।

पाठेघरको मुखको क्यान्सरजस्तो प्राणघातक रोगबाट बच्न एचपीभी खोप प्रभावकारी माध्यम भएकाले लक्षित सबै किशोरीलाई खोप अभियानमा सहभागी हुन सरकार र स्वास्थ्य निकायले अपिल गरेका छन् ।