देश जलाउने र देश जोगाउने शक्तिबीच प्रतिस्पर्धा : प्रचण्ड

काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले आसन्न निर्वाचनलाई तीन फरक धाराबीचको जनमत परीक्षणका रूपमा चित्रण गरेका छन्।

विकट क्षेत्रको चुनावी भ्रमणपछि आयोजित पत्रकार भेटघाटमा उनले देशलाई अस्थिरतातर्फ धकेल्ने प्रवृत्ति र राष्ट्रहित जोगाउने शक्तिबीच स्पष्ट प्रतिस्पर्धा भइरहेको बताएका हुन्।

प्रचण्डले भदौ २३ र २४ गते जिल्लामा भएका हत्या, आगजनी तथा तोडफोडका घटनाप्रति गम्भीर ध्यान दिन आग्रह गर्दै यस्ता गतिविधि लोकतान्त्रिक अभ्यासविरुद्ध भएको टिप्पणी गरे। विशेषगरी २३ गते साँझको ज्यान जाने घटना र २४ गते भएको आगजनीबारे सम्बन्धित पक्षले आत्मसमिक्षा गर्नुपर्ने उनले बताए। “गल्ती भएको छैन भन्ने प्रवृत्ति स्वयंमा खतरनाक संकेत हो,” उनले भने।

२४ गतेको घटनामा वामपन्थी तथा लोकतान्त्रिक दलसँग सम्बद्ध व्यक्तिका घरमा आक्रमण भएको दाबी गर्दै उनले देशलाई अस्थिर पार्ने उद्देश्यले सुनियोजित रूपमा गतिविधि भइरहेको आशंका व्यक्त गरे। २३ र २४ गतेका दुवै प्रकारका हिंसात्मक घटनालाई आफ्नो पार्टीले अस्वीकार गरेको उनले स्पष्ट पारेका हुन् ।

दाहालले शान्तिपूर्ण, निष्पक्ष र भयमुक्त वातावरणमा निर्वाचन सम्पन्न गराउन सबै राजनीतिक दल, प्रशासन र नागरिक समाज जिम्मेवार बन्नुपर्नेमा जोड दिएका छन् ।