धनगढीमा रास्वपाको शक्ति प्रदर्शन, रवि र बालेनको संयुक्त सम्बोधन

काठमाडौं । राष्ट्रिय स्वतन्त्र पार्टी (रास्वपा) ले धनगढीमा बृहद् चुनावी सभा आयोजना गरेको छ। पार्टीका सभापति रवि लामिछाने र वरिष्ठ नेता बालेन शाह उक्त सभालाई सम्बोधन गर्न बुधबार धनगढी पुगेका हुन्।

धनगढी -१ स्थित खुला चौरमा आयोजित सभामा हजारौँ समर्थकको उपस्थिति देखिएको छ। कार्यक्रमअघि ट्राफिक चौराहादेखि सभा स्थलसम्म र्‍याली निकालिएको हो। र्‍यालीका कारण केही समय बजार क्षेत्रको सवारी आवागमन प्रभावित बनेको स्थानीयले बताएका छन्।

कैलाली र कञ्चनपुरसहित सुदूरपश्चिमका विभिन्न जिल्लाबाट नेता तथा कार्यकर्ता धनगढी पुगेका छन्। सभामा पार्टी नेतृत्वले आगामी निर्वाचनको रणनीति, विकासका एजेण्डा र सुशासनको प्रतिबद्धताबारे धारणा राख्ने कार्यक्रम रहेको जानकारी गराएको छ।

धनगढीमा भएको यो शक्ति प्रदर्शनले सुदूरपश्चिममा रास्वपाको उपस्थितिलाई थप बलियो बनाउने संकेत गरेको छ। आगामी चुनाव नजिकिँदै जाँदा दलहरूबीच प्रतिस्पर्धा थप चर्किने देखिएको छ।