निर्वाचनका लागि तीन दिन सार्वजनिक बिदा दिन आयोगको सिफारिस

काठमाडौं । निर्वाचन आयोगले आसन्न प्रतिनिधिसभा सदस्य निर्वाचनका लागि फागुन २०, २१ र २२ गते तीन दिन सार्वजनिक बिदा दिन आइतबार नेपाल सरकारलाई सिफारिस गरेको छ।

आयोगका प्रवक्ता एवं सहसचिव नारायणप्रसाद भट्टराईका अनुसार, मतदानको अघिल्लो दिन, मतदानको दिन र भोलिपल्ट समेटेर तीन दिन बिदा दिँदा निर्वाचनमा सहभागिता बढाउने अपेक्षा गरिएको हो।

पहाडी जिल्लामा फागुन १८ गते सोमबार र तराई जिल्लामा फागुन १९ गते मङ्गलबार फागु पूर्णिमा अर्थात् होली पर्वको सार्वजनिक बिदा परेको छ।

त्यसैले तीन दिन सार्वजनिक बिदा दिँदा विभिन्न पेशा र व्यवसायमा संलग्न मतदाताहरूले आफ्नो नामावलीको स्थानबाट मतदान स्थलसम्म सहजै पुग्न सक्ने विश्वास गरिएको हो।

आयोगले अब सरकारसँग औपचारिक प्रस्ताव पेश गर्ने तयारी गरेको छ र सरकारले अन्तिम निर्णय गरेपछि बिदा अधिकारिक रूपमा घोषणा हुनेछ।