नेकपा र राष्ट्रिय मुक्ति पार्टीबीच एकता प्रक्रिया सुरु, सुमन सायमीको नेतृत्व

काठमाडौं । नेपाली कम्युनिष्ट पार्टी र राष्ट्रिय मुक्ति पार्टी नेपालका एकता पक्षधर समूहबीच पार्टी समायोजन कार्यक्रम सुरु भएको छ।

उपाध्यक्ष सुमन सायमीको नेतृत्वमा बुधबार काठमाडौंस्थित राष्ट्रिय सभागृहमा एकता सम्बन्धी कार्यक्रम आयोजना गरिएको हो।

उक्त कार्यक्रममा दुवै पार्टीका केन्द्रीय तथा स्थानीय तहका नेताहरूको सहभागिता रहेको छ। संगठनात्मक एकता, नेतृत्व समायोजन र आगामी राजनीतिक कार्यदिशाबारे छलफल गर्दै एकता प्रक्रिया अगाडि बढाइएको नेताहरूले बताएका छन्।

एकता पक्षधर नेताहरूले वैचारिक समानता र साझा राजनीतिक उद्देश्यका आधारमा पार्टी एकताको आवश्यकता रहेको उल्लेख गरेका छन्। समायोजन कार्यक्रमअन्तर्गत चरणबद्ध छलफलमार्फत संगठनलाई एकीकृत बनाइने जनाइएको छ।

एकता प्रक्रियालाई छिट्टै निष्कर्षमा पुर्‍याएर संयुक्त रूपमा राजनीतिक गतिविधि अघि बढाउने तयारी गरिएको नेताहरूले जानकारी दिएका छन् ।