न्युयोर्कमा कठोर चिसोको कहर : १४ जनाको ज्यान गयो

काठमाडौं । पछिल्लो एक सातादेखि जारी अत्यधिक चिसोका कारण न्युयोर्क सहरमा १४ जनाको मृत्यु भएको पुष्टि भएको छ। सहरका मेयर जोहरान ममदानीले चिसो मौसमले जनजीवन गम्भीर रूपमा प्रभावित बनाएको जानकारी दिनुभएको हो।

स्थानीय सञ्चारमाध्यमका अनुसार प्रारम्भिक अनुसन्धानमा कम्तीमा आठ जनाको मृत्यु प्रत्यक्ष रूपमा चिसो तापक्रमकै कारण भएको खुलेको छ। बाँकी घटनाबारे थप अनुसन्धान भइरहेको जनाइएको छ।

अमेरिकामा जनवरी २५ तारिखदेखि सुरु भएको शक्तिशाली जाडो आँधीले न्युयोर्कसहित विभिन्न क्षेत्रमा भारी हिमपात गराएको छ। अत्यधिक हिउँ जम्दा सडक, फुटपाथ तथा यातायात प्रणाली अवरुद्ध भएका छन्।

मेयर ममदानीका अनुसार हालसम्म करिब छ करोड ७० लाख पाउन्ड हिउँ हटाइसकिएको छ भने सडक र सार्वजनिक स्थान सफा गर्न करिब १८ करोड ८० लाख पाउन्ड नुन प्रयोग गरिएको हो।

चिसोबाट सबैभन्दा जोखिममा रहेका घरबारविहीन तथा विस्थापित व्यक्तिहरूलाई सुरक्षित राख्न विशेष उपाय अपनाइएको सहर प्रशासनले जनाएको छ। न्युयोर्कका पाँच स्थानमा तातो र सुरक्षित आश्रय केन्द्रहरू सञ्चालनमा ल्याइएका छन् भने नयाँ अस्थायी आश्रय एकाइहरू पनि खुला गरिँदै छन्।

सहर प्रशासनले अत्यधिक चिसोको जोखिम अझै कायम रहेकाले नागरिकहरूलाई अनावश्यक यात्रा नगर्न, न्यानो कपडा प्रयोग गर्न र आपतकालीन सेवासँग सम्पर्कमा रहन आग्रह गरेको छ।