पर्यटकको ‘अनलाइन ट्र्याकिङ’ दुई चरणमा देशभर लागु

काठमाडौं । नेपाल आउने विदेशी नागरिकको विवरण अब अनलाइन प्रणालीमार्फत दर्ता र अनुगमन गरिने भएको छ।
सरकारले १ जनवरी २०२६ देखि विदेशी नागरिक व्यवस्थापन सूचना प्रणाली अनिवार्य रूपमा लागू गरेको हो।

गृहमन्त्री ओमप्रकाश अर्याल र नेपाल पर्यटन बोर्डका प्रमुख कार्यकारी अधिकृत दीपकराज जोशीको उपस्थितिमा अध्यागमन विभागले उक्त प्रणालीको औपचारिक सुरुवात गरेको हो।
यसअघि १ असोजदेखि लागू गर्ने घोषणा गरिए पनि देशभित्रको परिस्थितिका कारण प्रणाली १ जनवरीदेखि मात्रै लागू गरिएको विभागले जनाएको छ।

अध्यागमन विभागका अनुसार प्रणाली दुई चरणमा लागू हुनेछ। पहिलो चरणमा काठमाडौं उपत्यकाका तारे होटलमा अनिवार्य गरिएको छ भने दोस्रो चरणमा १ मार्च २०२६ (१७ फागुन २०८२) देखि देशभरका तारे होटल, वायुसेवा कम्पनी, टुर्स एन्ड ट्राभल कम्पनी र मनी एक्सचेन्जमा लागू गरिनेछ।

त्यस्तै सबै प्रकारका होटल, गेस्ट हाउस तथा सार्वजनिक र निजी संस्थाबाट विदेशी नागरिकलाई प्रदान गरिने सेवामा पनि यो प्रणाली लागू हुनेछ। विदेशी नागरिकलाई सेवा दिने सबै संस्था प्रणालीमा आबद्ध हुनुपर्ने व्यवस्था गरिएको हाे ।

नेपाल भ्रमण गर्ने विदेशी नागरिकको सुरक्षा बढाउने, आवश्यक सूचनामा सहज पहुँच बनाउने, सम्भावित जोखिम नियन्त्रण गर्ने र पर्यटन प्रवर्द्धन गर्ने उद्देश्यले यो प्रणाली विकास गरिएको अध्यागमन विभागले जनाएको छ।

प्रणाली कार्यान्वयनसँगै नेपाल प्रवेश गर्ने विदेशी नागरिकको बसोबास र गतिविधिको अभिलेख व्यवस्थित हुने, आपतकालीन अवस्थामा खोज, उद्धार तथा सुरक्षा कार्यमा सहजता आउने विश्वास लिइएको छ।

साथै सुरक्षा निकाय, पर्यटन व्यवसायी र सरोकारवाला निकायबीच सूचना आदान–प्रदान अझ प्रभावकारी हुने जानकारी गराएको छ।