प्रसाईँमाथि बैंकिङ कसुरको मुद्दा : उच्च अदालत पाटनमा आज सुनुवाइ

काठमाडौं । मेडिकल व्यवसायी दुर्गा प्रसाईँविरुद्ध दायर बैंकिङ कसुरसम्बन्धी मुद्दामा आज उच्च अदालत पाटनमा सुनुवाइ हुँदैछ। उक्त मुद्दामा प्रसाईँसँगै उमा प्रसाईँ, नीराजन प्रसाईँ र आर्जु प्रसाईँलाई समेत विपक्षी बनाइएको छ।

उच्च अदालत पाटनका न्यायाधीशद्वय खड्कबहादुर केसी र कृपासुर कार्कीको संयुक्त इजलासमा मुद्दाको सुनुवाइ तोकिएको हो।

नेपाल राष्ट्र बैंकको पत्राचारको आधारमा केन्द्रीय अनुसन्धान ब्युरो (सीआईबी) ले अनुसन्धान सम्पन्न गरी विशेष सरकारी वकिलको कार्यालयमार्फत मुद्दा दायर गरेको थियो। सरकारी वकिल कार्यालयले दुर्गा प्रसाईँविरुद्ध १८ करोड ४४ लाख रुपैयाँ बराबरको बिगो दाबी गर्दै जरिवाना र कैद सजायको माग गरेको छ।

यसअघि अदालतले प्रसाईँलाई २५ लाख रुपैयाँ धरौटीमा रिहा गर्न आदेश दिएको थियो।
उनीमाथि बैंक तथा वित्तीय संस्थाका खातामा गलत कारोबार देखाएको, राउन्ड ट्रिपिङ गरेको तथा स्वार्थ बाझिने गरी आर्थिक कारोबार गरेको आरोप लगाइएको छ।

उच्च अदालत पाटनमा आजको सुनुवाइले दुर्गा प्रसाईँमाथि लगाइएको बैंकिङ कसुरको मुद्दाको आगामी प्रक्रियामा के निर्णय आउँछ भन्ने कुरा तय गर्नेछ। अदालतको अन्तिम फैसला यस मुद्दाको दिशालाई स्पष्ट बनाउने आशा गरिएको छ।