फागुन २१ निर्वाचन: २३ हजार मतदान केन्द्र

काठमाडौं । आउँदो फागुन २१ गते हुने प्रतिनिधिसभा सदस्य निर्वाचनका लागि निर्वाचन आयोगले देशभर १० हजार ९६७ मतदानस्थलमा कुल २३ हजार ११२ मतदान केन्द्र निर्धारण गरेको छ।

यस वर्षको निर्वाचनमा गत वर्षको तुलनामा ७५ वटा मतदानस्थल र ८८५ मतदान केन्द्र बढी छन्।
शनिबार आयोगले मतदाताको अन्तिम नामावली पनि प्रकाशन गरेको छ। प्रकाशित नामावली अनुसार ९६,६३,३५८ पुरुष, ९२,४०,१३१ महिला र अन्य २०० गरी जम्मा १,८९,०३,६८९ मतदाता रहेका छन्।

निर्वाचन आयोगका प्रवक्ता नारायणप्रसाद भट्टराईका अनुसार, ०७९ सालको प्रतिनिधिसभा तथा प्रदेशसभा सदस्य निर्वाचनमा कुल मतदाता संख्या १,७९,८८,५७० रहेकोमा यस वर्ष ९,१५,११९ ले वृद्धि भएको छ। यसअनुसार पुरुष मतदाताको संख्या ५,२२,५५२, महिला मतदाताको संख्या ३,९२,५५२ र अन्य मतदाताको संख्या १५ ले वृद्धि भएको छ।

मतदाताले आफ्नो नाम र विवरण आयोगको वेबसाइटमार्फत जाँच गर्न सक्नेछन्।