बलियो सरकार बन्ने दाबी गर्दै : लामिछाने

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले आगामी निर्वाचनपछि देशमा बलियो सरकार गठन हुने विश्वास व्यक्त गरेका छन्।

सोमबार चितवनको कालिका नगरपालिका–३ मा आयोजित स्थानीय भेटघाट कार्यक्रममा उनले यस्तो धारणा राखेका हुन्।लामिछानेले देशभर आफ्नो पार्टीप्रति सकारात्मक माहोल बनेको दाबी गर्दै आगामी चुनावपछि स्थिर र प्रभावकारी सरकार बन्ने बताए। “अहिले देशभर माहोल सकारात्मक छ, यसपटक बलियो सरकार बन्ने आशा देखिएको छ,” उनले भने।

उनले सरकारमा रहँदा जनताको समस्या समाधान गर्न प्रयास गरे पनि सबै काम पूरा गर्न नसकेको स्वीकार गरे। सुकुम्बासी समस्या पुरानै रहेको उल्लेख गर्दै उनले नेताहरूले भाषणभन्दा काममार्फत परिणाम देखाउनुपर्ने धारणा राखे। स्थानीय बासिन्दाले भने पटक–पटक आश्वासन पाए पनि सुकुम्बासी समस्या समाधान नभएको गुनासो गरेका हुन् । त्यसप्रति गम्भीर ध्यान दिने प्रतिबद्धता समेत लामिछानेले व्यक्त गरेका छन्।

आगामी निर्वाचनलाई लक्षित गर्दै राजनीतिक माहोल तातिँदै गएको बेला जनताको विश्वास जित्दै देशमा स्थिर र बलियो सरकार गठन गर्ने लक्ष्यका साथ राष्ट्रिय स्वतन्त्र पार्टी अघि बढिरहेको देखिन्छ ।