बीपी राजमार्गमा दुर्घटना : बसको ठक्करबाट स्कुटर चालकको ज्यान गयो

काठमाडौं । कमलामाई नगरपालिका–४ हिरापानीस्थित बीपी राजमार्ग खण्डमा बसले स्कुटरलाई ठक्कर दिँदा एक जनाको मृत्यु भएको छ।

बुधबार दिउँसो काठमाडौंबाट मरिणतर्फ जाँदै गरेको बा४ख ३८९४ नम्बरको बसले सिन्धुलीबाट चियाबारीतर्फ गुडिरहेको ज१०प ९२३ नम्बरको स्कुटरलाई ठक्कर दिएको प्रहरीले जनाएको छ।

जिल्ला प्रहरी कार्यालय सिन्धुलीका प्रहरी नायब उपरीक्षक सूर्यप्रकाश सुवेदीका अनुसार दुर्घटनामा गम्भीर घाइते भएका गोलञ्जोर गाउँपालिका–२ वितिजोरका ३५ वर्षीय चन्द्र श्रेष्ठलाई उपचारका लागि सिन्धुली अस्पताल ल्याइएको हो । उपचारका क्रममा चिकित्सकले उनलाई मृत घोषणा गरेका हुन्।

दुर्घटनापछि बस चालक हरिहरपुरगढी गाउँपालिका–५का राजकुमार माझीलाई प्रहरीले नियन्त्रणमा लिई घटनाबारे थप अनुसन्धान अघि बढाएको जानकारी दिएको छ।

बीपी राजमार्गमा बढ्दो सवारी चापसँगै दुर्घटनाका घटना दोहोरिन थालेका छन्। सम्बन्धित निकायले सडक सुरक्षामा थप ध्यान दिनुपर्ने आवश्यकता फेरि एकपटक उजागर भएको बताएको छ ।