मध्यपूर्वमा युद्ध चर्किँदै: आक्रमण र तनाव बढ्दो

काठमाडौं । मध्यपूर्वमा जारी युद्ध दोस्रो सातामा प्रवेश गर्दै आक्रमण र प्रतिकारात्मक कारबाही तीव्र भएका छन्। इरान, इजरायल र खाडी क्षेत्रका घटनाले क्षेत्रीय तनाव बढाएको छ भने ऊर्जा आपूर्ति र समुद्री मार्ग प्रभावित भएका छन्।

इरानको तेहरानमा अमेरिका–इजरायलको संयुक्त हवाई आक्रमणपछि इन्धन भण्डारण केन्द्रमा आगलागी भएको छ।

एएफपीका अनुसार सहरभर बाक्लो कालो धुवाँ देखिएको छ। इरानको सर्वोच्च नेतृत्व चयन प्रक्रियामा गति लिएको छ, तर नयाँ नेता अझै घोषणा भएको छैन। लेबनानको बेरुतस्थित होटलमा भएको इजरायली हवाई कारबाहीमा चार जनाको मृत्यु भएको स्वास्थ्य मन्त्रालयले जनाएको छ।

दक्षिणी लेबनानमा हिजबुल्लाहसँगको लडाइँ जारी छ। समुद्री मार्ग होर्मुज जलडमरुमा टगबोट विस्फोट हुँदा तीन चालक दल सदस्य बेपत्ता छन्।

साउदी अरेबिया, संयुक्त अरब इमिरेट्स, कतार, कुवेत र बहराइनमा मिसाइल वा ड्रोन आक्रमण प्रयास भएको जनाइएको छ।इरानी राष्ट्रपति मसुद पेजेस्कियानले छिमेकी देशको भूमिबाट आक्रमण भएमा जवाफ दिन तेहरान बाध्य हुने बताएका छन्।

अमेरिकी राष्ट्रपति डोनाल्ड ट्रम्पले इरानको एक प्राथमिक विद्यालयमा भएको आक्रमणको दोष तेहरानमाथि लागेको बताएका छन्।

युद्धका कारण क्षेत्रीय सुरक्षा अस्थिरता र ऊर्जा आपूर्तिमा असर परेको विश्लेषकहरूले जानकारी दिएका छन् ।