मादुरो रिहाइको मागमा काराकसमा विशाल प्रदर्शन

काठमाडौं । घातक अमेरिकी सैन्य कारबाहीपछि हटाइएका भेनेजुएलाका पूर्व राष्ट्रपति निकोलस मादुरोको रिहाइको माग गर्दै हजारौँ समर्थकहरू राजधानी काराकसका सडकमा उत्रिएका छन्।

प्रदर्शनकारीहरूले मादुरो भेनेजुएलाका लागि अपरिहार्य नेता भएको दाबी गर्दै न्युयोर्कमा लागूऔषधसम्बन्धी मुद्दा लगाएर उनलाई अपदस्थ गरिएको भन्दै विरोध जनाएका हुन् ।

प्रदर्शनमा सहभागी अधिकांश सार्वजनिक क्षेत्रका कर्मचारीहरू रहेका छन् । उनीहरूले मादुरो र उनकी पत्नी सिलिया फ्लोरेसका तस्बिर बोकेर भेनेजुएलाको झण्डा फहराएका छन् । ह्युगो चावेजको नाम जोडिएको रातो पोशाकमा सजिएका समर्थकहरूको पदयात्रा सयौँ मिटर लामो रहेको बताइएको छ।

यसैबीच अन्तरिम राष्ट्रपति डेल्सी रोड्रिगेज राजनीतिक संकटको चपेटामा छन्। वासिङ्टनले मादुरो समर्थक र सर्वसाधारणको समर्थन खोजिरहेको जनाइएको छ। अमेरिकी राष्ट्रपति डोनाल्ड ट्रम्पले रोड्रिगेज अमेरिकासँग सहकार्य गर्न इच्छुक रहेको र भेनेजुएलाको विशाल तेल भण्डारमा पहुँच दिन तयार रहेको बताएका छन्। दबाब बढेपछि रोड्रिगेज सरकारले राजनीतिक बन्दी रिहाइ र हाइड्रोकार्बन उद्योग निजी लगानीका लागि खोल्ने प्रक्रिया अघि बढाएको छ।

अमेरिकी मिसनले सार्वजनिक गरेको भिडियोमा संकटग्रस्त भेनेजुएलालाई “स्थिर, समृद्ध र लोकतान्त्रिक” बनाउने तीन चरणको योजना प्रस्तुत गरिएको छ।

यसअघि पनि सयौँ विश्वविद्यालय विद्यार्थी र राजनीतिक बन्दीका आफन्तहरूले कानून तत्काल स्वीकृत गर्न माग गर्दै प्रदर्शन गरेका हुन् । विपक्षी दलहरूले मादुरो अपदस्थ भएपछि निष्पक्ष नयाँ निर्वाचनको मागलाई अझ तीव्र बनाएका छन्।

भेनेजुएलामा सत्ता, सडक र अन्तर्राष्ट्रिय दबाबबीचको संघर्ष चर्किँदै जाँदा राजनीतिक भविष्य अझै अनिश्चित बनेको छ।