मैतीदेवीबाट गरे मतदान, आगामी पाँच वर्षको दिशा यही निर्वाचनले तय गर्ने : गगन थापा

काठमाडौं । नेपाली कांग्रेसका सभापति गगनकुमार थापाले काठमाडौंको मैतीदेवी मन्दिरस्थित मयुरकुण्ड मतदान केन्द्रबाट आफ्नो मत खसालेका छन्।

बिहीबार बिहान मतदान गरेपछि सञ्चारकर्मीसँग संक्षिप्त प्रतिक्रिया दिँदै उनले अहिलेको निर्वाचनले आगामी पाँच वर्षका लागि देश सञ्चालनको स्पष्ट मार्गनिर्देशन दिने बताए।

उनले संविधानको निर्धारित मार्गभन्दा बाहिर राजनीतिक अवस्था जान थालेपछि देश लामो समय अनिश्चिततातर्फ जान सक्ने चिन्ता उत्पन्न भएको उल्लेख गर्दै यस निर्वाचनले लोकतान्त्रिक प्रक्रियालाई पुनः सही दिशामा ल्याउने विश्वास व्यक्त गरे।

थापाले देशभर शान्तिपूर्ण वातावरणमा मतदान भइरहेको भन्दै यसले लोकतान्त्रिक प्रणालीप्रति जनताको विश्वास झल्काएको बताए समेत बताएका छन् ।

नेपाली कांग्रेसले सभापति थापालाई भावी प्रधानमन्त्रीको रूपमा प्रस्तुत गर्दै आएको छ। उनी सर्लाही निर्वाचन क्षेत्र नम्बर–४ बाट प्रतिनिधिसभा सदस्यका उम्मेदवार हुन्।

देशभरका मतदान केन्द्रहरूमा मतदाताहरू बिहानैदेखि उपस्थित भई आफ्नो मताधिकार प्रयोग गरिरहेका छन्। निर्वाचन शान्तिपूर्ण र व्यवस्थित रूपमा सम्पन्न हुने विश्वास व्यक्त गरिएको छ।