युवामैत्री रूपान्तरणसहित कांग्रेस चुनावी प्रतिस्पर्धामा

काठमाडौँ । नेपाली कांग्रेसले आफूलाई समयअनुकूल रूपान्तरण गर्दै नयाँ पुस्ताको अपेक्षा र भावना समेटेर अघि बढिरहेको दाबी गरेको छ।

पार्टी नेतृत्वले कांग्रेस अब पुरानो ढाँचामा सीमित नरही नीति, व्यवहार र संगठनात्मक संरचनामा परिवर्तनसहित निर्वाचनमा उत्रिएको जनाएको छ।

कांग्रेसले सुरु गरेको ‘कांग्रेस डबली’ नामक संवाद कार्यक्रमको पहिलो संस्करणमा बोल्दै पार्टी प्रवक्ता देवराज चालिसेले युवाको चाहनाअनुसार कांग्रेसको सोच र कार्यशैली परिमार्जन गरिएको उल्लेख गरेका छन् ।

उनका अनुसार कांग्रेसमा अहिले युवा सहभागिता बढ्दै गएको छ र पार्टीप्रति भरोसा पुनः स्थापित हुँदैछ।

“आजको पुस्ताले खोजेको परिवर्तनलाई ध्यानमा राख्दै कांग्रेसले आफ्नो स्वरूप र आचरण सुधार गरेको छ,” उनले भने, “अब कांग्रेस केवल इतिहासमा सीमित छैन, भविष्य निर्माणको जिम्मेवारी बोकेर अघि बढेको छ।”

उनले आन्तरिक लोकतन्त्र बलियो नहुँदासम्म नेतृत्व परिवर्तन मात्रले सार्थक परिणाम नदिने उल्लेख गरे।

कार्यक्रमका वक्ताहरूले राजनीतिक दलहरूले विचार, नीति र व्यवहारमा निरन्तर सुधार गर्दै जनविश्वास जित्नुपर्ने आवश्यकता औँल्याउँदै यस्ता खुला संवादहरूले लोकतन्त्रलाई थप सुदृढ बनाउने निष्कर्ष निकालेका छन् ।