रवि–बालेन पक्षबीच समानुपातिक सिट बाँडफाँटमा विवाद, रास्वपाभित्र आन्तरिक सकस

राष्ट्रिय स्वतन्त्र पार्टी (रास्वपा) भित्र समानुपातिक सिटको भागबण्डालाई लिएर आन्तरिक सकस देखिएको छ। स्रोतहरूका अनुसार पार्टी सभापति रवि लामिछाने पक्षले आफ्नो अख्तियारी प्रयोग गर्दै बालेन शाह पक्षलाई न्यून सिट दिने मनस्थिति बनाएको चर्चा छ।
स्रोतका अनुसार संसदीय दलमा आफ्नो पक्षका नेताहरूको बहुमत सुनिश्चित गर्ने उद्देश्यले यस्तो रणनीति बनाइएको बताइन्छ। संसदीय दलमा बहुमत पुगेको अवस्थामा आवश्यक परे नेतृत्व परिवर्तन गर्न सकिने राजनीतिक गणितलाई समेत यससँग जोडेर हेरिएको छ।
यस्तै, भविष्यमा पार्टीभित्रको विवाद चर्किएर विभाजनको अवस्था आएमा आवश्यक पर्ने ४० प्रतिशत संसदीय समर्थनको अंकगणितलाई ध्यानमा राख्दै बालेन पक्षलाई सीमित सिटमा राख्ने रणनीति अपनाइएको विश्लेषण गरिएको छ।
उता, पार्टी प्रवेशका बेला केन्द्रीय समितिमा करिब ४० प्रतिशत हिस्सा पाएको बालेन पक्ष भने संसदीय दलमा पनि त्यही स्तरको शक्ति सुरक्षित गर्ने प्रयासमा रहेको बताइन्छ।
यही कारणले रास्वपाभित्र समानुपातिक सिटको भागबण्डामा सहमति जुट्न नसकेको स्रोतहरू बताउँछन्। राजनीतिक वृत्तमा यसले नयाँ सरकार गठनको प्रक्रिया पनि केही समय ढिला हुन सक्ने चर्चा चलिरहेको छ।