राष्ट्रिय स्वतन्त्र पार्टीद्वारा निर्वाचन सम्पन्न गराउन सहयोग गर्ने सबैप्रति धन्यवाद

काठमाडौं । राष्ट्रिय स्वतन्त्र पार्टी ले प्रतिनिधिसभा सदस्य निर्वाचन सफलतापूर्वक सम्पन्न गराउन सहयोग गर्ने सम्पूर्ण पक्षप्रति आभार व्यक्त गरेको छ।

पार्टीका सभापति रवि लामिछानेले बिहीबार एक विज्ञप्ति जारी गर्दै विभिन्न चुनौतीका बाबजुद ऐतिहासिक प्रतिनिधिसभा निर्वाचन सम्पन्न गर्न सहयोग पुर्‍याउने सबै सरोकारवालाप्रति हार्दिक धन्यवाद ज्ञापन गरेका हुन्।

विज्ञप्तिमा निर्वाचनलाई निर्धारित मितिमै सम्पन्न गर्न योगदान पुर्‍याउने सम्माननीय प्रधानमन्त्री, नेपाल सरकारका निकायहरू, निर्वाचन आयोग नेपाल, राष्ट्रसेवक कर्मचारी, सुरक्षा निकाय, राजनीतिक दल, सञ्चार जगत, नागरिक समाज, राष्ट्रिय तथा अन्तर्राष्ट्रिय पर्यवेक्षक र आम मतदाताप्रति विशेष आभार व्यक्त गरिएको छ।

पार्टीले अब आउने निर्वाचन परिणामले जनताले चाहेको लोकतन्त्र, पारदर्शिता, उत्तरदायित्व र सुशासनको अपेक्षा सम्बोधन गर्ने विश्वास व्यक्त गरेको पनि विज्ञप्तिमा उल्लेख गरिएको छ।