रास्वपाको परिवर्तन उद्घोष सभामा भ्रष्टाचार अन्त्य र ऐतिहासिक परिवर्तनमा जोड – सभापति लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रबि लामिछानेले आज धनगढीमा आयोजित सभामा उपस्थित जनतालाई सम्बोधन गर्दै आगामी चुनावमा जनताको अधिकार र ऐतिहासिक परिवर्तन सुनिश्चित गर्ने प्रतिबद्धता व्यक्त गरेका छन् ।

अध्यक्ष लामिछानेले भने, “यसपटक जनता नै जित्ने हो। इतिहास बदल्ने सोच लिएर हामी यहाँ आएका छौँ। हाम्रो उद्देश्य व्यक्तिगत राजनीतिक आकांक्षा होइन, देशको वास्तविक राजनीतिक परिवर्तन सुनिश्चित गर्नु हो सुदूरपश्चिमका भूमिहीन, बेरोजगार, शिक्षा र स्वास्थ्यका समस्याहरू समाधान गर्न हामी प्रतिबद्ध छौँ।”

उक्त भाषणमा उनले पुराना राजनीतिक दलहरूको काम र भोट बैंक प्रणालीको आलोचना गर्दै भन्नुभयो, “कयौं जनताका समस्यालाई लिएर एजेन्डा बनाएर वर्षौँसम्म स्थायी बनाइएको छ। रास्वपाले भने राजनीतिक विकृति र बेसङ्गतिको अन्त्य गर्दै, जनताको वास्तविक अधिकार सुनिश्चित गर्नेछ।”

यसैबीचमा लामिछानेले विदेशमा रहेका नेपालीहरूलाई सम्झिदै उनीहरूप्रति सम्मान व्यक्त गर्दै भनेका छन् कि तपाईंहरूले विदेशमा भोग्नुपरेको कठिनाइहरू दुःखद छन्। त्यसैले यस पटक देशमा योगदान पुर्‍याउने, देश बनाउन र इतिहास रच्न नेपाल फर्किन आग्रह समेत गरेका हुन् ।

भोटरलाई प्रत्यक्ष र समानुपातिक उम्मेदवारका लागि स्पष्ट निर्देशन दिँदै भनेका छन् ।, “घरघरमा जानुहोस् र भन्नुहोस्, घण्टीको तर्फबाट हामी आएका छौँ। भ्रष्टाचार र बेथिति फाल्नुपर्छ आदि हैन पुरै फाल्ने हो त्यसैले प्रत्यक्षमा पनि घण्टी, समानुपातिकमा पनि घण्टी, यहाँ पनि घण्टी, त्यहाँ पनि घण्टी। सबको जय होस्। जय देश, जय घण्टी।”

यस चुनावलाई ऐतिहासिक अवसरको रूपमा व्याख्या गर्दै, सबै जनतालाई सक्रिय सहभागी भई देशको भविष्य निर्माणमा साथ दिन आग्रह गरेका छन् ।