रास्वपाको ‘वाचापत्र’ अन्तिम चरणमा, फागुन पहिलो साता सार्वजनिक हुने

काठमाडौं । राष्ट्रिय स्वतन्त्र पार्टी (रास्वपा) ले तयारी गरिरहेको बहुप्रतीक्षित ‘वाचापत्र’ अन्तिम चरणमा पुगेको छ।

उपसभापति डा. स्वर्णिम वाग्लेको नेतृत्वमा ‘वाचापत्र मस्यौदा कार्यदल’ गठन भई तीव्र रूपमा काम भइरहेको पार्टीले जनाएको छ। मस्यौदा कार्यदलमा डा. नन्दन यादव, डा. अरनिको पाण्डे लगायतका विज्ञ तथा नेताहरूको सक्रिय संलग्नता रहेको छ।

पार्टीका अनुसार भौगोलिक विविधता, व्यवसायिक क्षेत्रगत अनुभव तथा दलका आन्तरिक संयन्त्रबाट आएका सुझावहरू संकलन गरी वाचापत्रको मस्यौदा तयार पारिँदैछ।

रास्वपाले जनआवाज र तथ्यमा आधारित नीति प्रस्ताव गर्ने लक्ष्यसहित वाचापत्रलाई व्यावहारिक र कार्यान्वयनयोग्य बनाउने प्रयास गरेको बताएको छ। तयारीअनुसार फागुन महिनाको पहिलो सातामै वाचापत्र सार्वजनिक गर्ने योजना छ।

पार्टी नेतृत्वले वाचापत्रमार्फत समसामयिक चुनौतीहरूलाई सम्बोधन गर्ने स्पष्ट दिशानिर्देश प्रस्तुत हुने विश्वास व्यक्त गरेको छ।