रास्वपालाई बधाई, गगन थापाले मागे गिरीबन्धु र वाइडबडी प्रकरणको छानबिन

काठमाडौं । सभापति गगनकुमार थापाले नेपाली कांग्रेसको केन्द्रीय कार्यसमिति बैठकमा राष्ट्रिय स्वतन्त्र पार्टीलाई सरकारको नेतृत्व पाएकोमा बधाई दिएका छन्।

सानेपामा मंगलबार भएको बैठकलाई सम्बोधन गर्दै उनले अब कांग्रेसले प्रमुख प्रतिपक्षको भूमिकामा बसेर सरकारलाई जिम्मेवार बनाउने बताएका छन्। साथै उनले रचनात्मक प्रतिपक्षका रूपमा सरकारलाई सहयोग गर्ने प्रतिबद्धता जनाए।

थापाले गिरीबन्धु प्रकरण, वाइडबडी विमान खरिद प्रकरण तथा नेताहरूका घरमा भेटिएको भनिएको नगदबारे निष्पक्ष छानबिन हुनुपर्ने माग गरेका छन्।

उनले सार्वजनिक पदमा रहेका सबै व्यक्तिको सम्पत्ति छानबिन गरी जवाफदेही बनाउनुपर्नेमा जोड दिएका हुन् ।

त्यस्तै थापाले विगतका विवादित घटनाहरूको पनि निष्पक्ष छानबिन र संलग्नमाथि कारबाही हुनुपर्ने बताउँदै पारदर्शिता र उत्तरदायित्वलाई प्राथमिकता दिनुपर्ने उल्लेख गरेका छन् ।