रुपन्देहीमा ट्रकको ठक्कर, २१ वर्षीय युवकको मृत्यु

काठमाडौं । रुपन्देहीको तिलोत्तमामा ट्रकको ठक्करबाट एक युवकको मृत्यु भएको छ।

मंगलबार तिलोत्तमा–१५ कोटिहवामा मालबाहक ट्रकले मोटरसाइकललाई ठक्कर दिँदा बुटवलका २१ वर्षीय उमेश गुप्ताको ज्यान गएको हो।

आज भैरहवादेखि बुटवलतर्फ आउँदै गरेको ट्रकले गुप्ता सवार बुलेट मोटरसाइकललाई ठक्कर दिएको ट्राफिक प्रहरीले जनाएको छ।

दुर्घटनामा गम्भीर घाइते भएका गुप्ताको उपचारका क्रममा मणिग्रामस्थित अस्पतालमा मृत्यु भएको हो। घटनापछि ट्रक चालकलाई प्रहरीले नियन्त्रणमा लिएको छ भने दुर्घटनाबारे थप अनुसन्धान भइरहेको छ।

पछिल्लो समय बढ्दै गएको सवारी दुर्घटनाले सडक सुरक्षामाथि पुनः प्रश्न उठाएको छ।