विशेष महाधिवेशनको दबाब चर्कियो, कांग्रेस केन्द्रीय कार्यालय सानेपा घेराउ

काठमाडौं । नेपाली कांग्रेसभित्र विशेष महाधिवेशनको माग गर्दै आएका पक्षधर कार्यकर्ताहरूले पार्टी केन्द्रीय कार्यालय सानेपा घेराउ गरेका छन्।

नियमित १५औँ महाधिवेशनको कार्यतालिका असफल भएपछि विशेष महाधिवेशनको माग झनै चर्किएको हो।

महामन्त्रीद्वय गगन थापा र विश्वप्रकाश शर्मा नेतृत्वको समूहले विशेष महाधिवेशनको तयारी तीव्र पारेको बताइएको छ।

पार्टी विधानको धारा १७(२) अनुसार ५४ प्रतिशतभन्दा बढी अर्थात् २,४८८ महाधिवेशन प्रतिनिधिहरूले हस्ताक्षर बुझाएको करिब तीन महिना बितिसक्दा पनि केन्द्रीय नेतृत्वले निर्णय नगरेको भन्दै पक्षधरहरू आक्रोशित बनेका छन्।

विशेष महाधिवेशन पक्षधर कार्यकर्ताहरूले केन्द्रीय कार्यालय घेराउ गर्दै नाराबाजी गरेका हुन् । उनीहरूले पुस मसान्तभित्र विशेष महाधिवेशन गर्ने तयारीस्वरूप भृकुटीमण्डपमा हलसमेत बुकिङ गरिसकेको बताएका छन्।

तर, संस्थापन पक्षले भने विशेष महाधिवेशनको सट्टा नियमित महाधिवेशनलाई वैशाखमा सारेर अघि बढ्ने निर्णय गरेको छ। यसले कांग्रेसभित्रको आन्तरिक विवाद थप चुलिएको देखिएको छ।

पार्टीभित्रको यो कलहले आगामी फागुनमा हुने संसदीय निर्वाचनमा समेत असर पार्ने संकेत देखिएको छ। पार्टी एकता कायम राख्न छलफल जारी रहे पनि हालसम्म सहमति जुट्न सकेको छैन।

कांग्रेसभित्र विशेष र नियमित महाधिवेशनको विवादले पार्टीको आन्तरिक संरचना मात्रै होइन, आगामी निर्वाचनको तयारीलाई समेत अन्योलमा पारेको छ। समयमै सहमति र स्पष्ट निर्णय नआए आन्तरिक असन्तुष्टि अझै बढ्ने देखिन्छ।