सत्ता होइन, परिवर्तन चाहियो : ऋषि धमला

काठमाडौं । आगामी प्रतिनिधिसभा निर्वाचनमा रौतहट क्षेत्र नम्बर–४ बाट प्रतिस्पर्धामा उत्रिएका चर्चित सञ्चारकर्मी ऋषि धमला ले मन्त्री पदको प्रस्ताव अस्वीकार गर्दै आफू चुनावी मैदानमा आएको बताएका छन्।

आज चन्द्रनिगाहपुरमा आयोजित पत्रकार अन्तरक्रिया कार्यक्रममा बोल्दै धमलाले आफ्नो राजनीतिक यात्रा पद र शक्तिका लागि नभई जनताको अवस्था सुधारका लागि भएको दाबी गरेका हुन् ।

उनले विभिन्न पक्षबाट मन्त्री बन्न आग्रह आएको तर त्यसलाई अस्वीकार गरेको उल्लेख गरे। “मन्त्री पद ठूलो कुरा होइन, मेरो लक्ष्य जनताको जीवनस्तर बदल्नु हो,” भन्दै उनले रौतहटको गरिबी, बेरोजगारी र अशिक्षा अन्त्यमा आफू केन्द्रित हुने बताए।

धमला आम जनता पार्टी बाट ‘मोबाइल फोन’ चुनाव चिह्न लिएर प्रतिस्पर्धामा छन्। लामो पत्रकारिता अनुभवलाई राजनीतिक नेतृत्वमा रूपान्तरण गर्ने उनको तयारीले रौतहट–४ को चुनावी माहोललाई थप चासोपूर्ण बनाएको छ।

उनले विजयी भए रौतहटलाई नमुना जिल्ला बनाउने, सुशासन स्थापित गर्ने र भ्रष्टाचारविरुद्ध कडा कदम चाल्ने प्रतिबद्धता समेत व्यक्त गरेका छन् ।

बिहानदेखि मध्यरातसम्म घरदैलो अभियानमा सक्रिय रहेको दाबी गर्दै उनले जनतासँग प्रत्यक्ष संवादलाई प्राथमिकता दिएको बताएका हुन् ।

यसैबीच, रौतहट–४ मा उनको उम्मेदवारीसँगै चुनावी प्रतिस्पर्धा झनै रोचक बनेको छ। मतदाताले विकास, सुशासन र परिवर्तनका एजेन्डालाई कत्तिको साथ दिन्छन् भन्ने विषयले अबको चुनावी परिणाम निर्धारण गर्नेछ।