सहिद दिवसमा प्रधानमन्त्री कार्की द्वारा श्रद्धाञ्जली अर्पण

काठमाडौं । प्रधानमन्त्री सुशीला कार्कीले सहिद दिवसका अवसरमा लैनचौरस्थित सहिद स्मारकमा पुगेर  सहिदप्रति श्रद्धाञ्जली अर्पण गरेकी छिन्।

आज आयोजित कार्यक्रममा प्रधानमन्त्री कार्कीले प्रजातन्त्र, राष्ट्र, स्वतन्त्रता र जनअधिकारका लागि जीवन उत्सर्ग गरेका सहिदको योगदान स्मरण गरेकी हुन् ।

काठमाडौँ महानगरपालिकाले माघ १० गतेदेखि सहिद सप्ताह मनाउँदै आएको साताव्यापी कार्यक्रमको अन्तिम दिन आज सहिद उद्यान, लैनचौरमा विशेष श्रद्धाञ्जली सभा आयोजना गरिएको हो।

सहिद दिवसको अवसरमा बिहान शान्तिवाटिकाबाट प्रभातफेरी निकालिएको थियो। नेपाल प्रहरी र सशस्त्र प्रहरीको ब्यान्ड र मार्चपाससहितको प्रभातफेरी सहिद उद्यान पुगेर श्रद्धाञ्जली सभामा परिणत भएको छ ।

सभामा प्रधानमन्त्री कार्की, गृहमन्त्री ओमप्रकाश अर्याल, मन्त्रीहरू, सरकारी अधिकारी, जनप्रतिनिधि तथा सुरक्षा निकायका प्रमुखहरूको उपस्थिति रहेको हो।

त्यस्तै काठमाडौँ महानगरपालिकाकी कार्यवाहक प्रमुख सुनिता डङ्गोलले समेत  सहिदको त्याग र बलिदान कहिल्यै बिर्सन नहुने बताएकी छिन्।