सुनचाँदीको मूल्यमा तीव्र वृद्धि, सुन तोलाको ३ लाख १८ हजार नाघ्यो

काठमाडौं । नेपाली बजारमा सुन र चाँदीको मूल्य निरन्तर बढ्दै नयाँ रेकर्ड बनाइरहेको छ।

आज सुनको मूल्य एकैदिन उल्लेख्य रुपमा बढेर हालसम्मकै उच्च विन्दुमा पुगेको हो। नेपाल सुनचाँदी व्यवसायी महासङ्घका अनुसार आज सुन तोलामा ९ हजार ५ सय रुपैयाँले महँगिएको छ।

यससँगै छापावाल सुनको मूल्य तोलाको ३ लाख १८ हजार ८ सय रुपैयाँ कायम भएको छ।

त्यस्तै, चाँदीको मूल्य पनि आज ४ सय ३० रुपैयाँले बढ्दै तोलाको ७ हजार ३ सय रुपैयाँ पुगेको छ। यसअघि मंगलबार सुन तोलाको ३ लाख ९ हजार ३ सय रुपैयाँ र चाँदी ६ हजार ८ सय ७० रुपैयाँमा कारोबार भएको हो।

अन्तरराष्ट्रिय बजारमा समेत बहुमूल्य धातुको मूल्य उकालो लागेको देखिन्छ।

अन्तरराष्ट्रिय सञ्चारमाध्यमहरूका अनुसार आज विश्व बजारमा सुन प्रतिऔँस करिब ५ हजार २ सय अमेरिकी डलरमा कारोबार भइरहेको छ भने चाँदी प्रतिऔँस १ सय ११ डलर हाराहारीमा रहेको छ।

अन्तरराष्ट्रिय बजारको प्रभाव र लगानीकर्ताको बढ्दो आकर्षणका कारण आगामी दिनमा पनि सुनचाँदीको मूल्य अस्थिर रहन सक्ने अनुमान गरिएको छ।