सुर्खेतकी किशोरीको रहस्यमय मृत्यु : निष्पक्ष छानबिनको माग चर्कियो

काठमाडौं । सुर्खेतकी १६ वर्षीया इनिशा विकको मृत्यु प्रकरणलाई लिएर देशभर आक्रोश बढ्न थालेको छ। घटनाको निष्पक्ष छानबिन र दोषीलाई कडा कारबाहीको माग गर्दै बुधबार काठमाडौंको माइतीघर मण्डलामा प्रदर्शन गरिएको छ।

आज महिलामाथि बढ्दो हिंसा, बलात्कार तथा हत्या घटनाको विरोधमा युवाहरु, मानवअधिकारकर्मी र दलित अधिकारका अभियन्ताहरू सडकमा उत्रिएका हुन्। प्रदर्शनमा सहभागीहरूले पीडित परिवारलाई न्याय दिलाउन राज्यले प्रभावकारी कदम चाल्नुपर्ने माग गरेका छन्।

प्रदर्शनका क्रममा ‘महिला हिंसा अन्त्य गर’, ‘इनिशा विकलाई न्याय दे’, ‘समाजमा हिंसा बन्द गर’ जस्ता नारा लेखिएका प्लेकार्ड बोकेर प्रदर्शन गरिएको हो । सहभागीहरूले समाजमा दलित समुदाय र महिलामाथि भइरहेका हिंसात्मक घटनाप्रति गम्भीर ध्यान दिन सरकारसँग आग्रह गरेका हुन् ।

अधिकारकर्मीहरूले मृतक इनिशाको आत्माको शान्तिको कामना गर्दै दीप प्रज्वलनसमेत गरेका छन् ।। उनीहरूले घटनाको निष्पक्ष अनुसन्धान गरी दोषीलाई कडा कानुनी कारबाही गर्नुपर्ने माग दोहोर्याएका छन्।

सुर्खेतको गुर्भाकोट नगरपालिका–६ स्थायी घर भएकी इनिशा फागुन २३ गते ट्युसन पढ्न घरबाट निस्किएकी थिइन्। पछि वीरेन्द्रनगर–१ नजिकैको सामुदायिक वन क्षेत्रमा उनी अचेत अवस्थामा फेला परेकी हुन् । अस्पताल पुर्‍याइएलगत्तै चिकित्सकले उनलाई मृत घोषणा गरेका थिए।

प्रहरीले घटनामा संलग्न रहेको आरोपमा चार जनालाई नियन्त्रणमा लिएर अनुसन्धान अघि बढाएको जानकारी दिएको छ।घटनाको सत्यतथ्य सार्वजनिक गर्न र दोषीलाई कारबाही गर्न दबाब बढ्दै गएको देखिन्छ ।