सुर्खेतबाट गगन थापाको हुंकार : पाँच वर्षभित्र फोहोर राजनीति सफा गर्छौँ

काठमाडौं ।  थापाले आगामी निर्वाचनलाई “बाध्यताको चुनाव”को संज्ञा दिएका छन्।

सुर्खेतमा आयोजित चुनावी आमसभालाई सम्बोधन गर्दै बिहिवार नेपाली कांग्रेसका सभापति गगन थापाले अहिलेको मतदान प्रक्रिया देशको संविधानलाई सही दिशामा अघि बढाउन अपरिहार्य रहेको बताएका हुन्।

उनका अनुसार चुनाव सफल बनाउन पार्टीले आवश्यक भूमिका निर्वाह गरिसकेको छ। फागुन २१ गते हुने मतदानको सन्दर्भमा भदौ २३ र २४ का घटनालाई बेवास्ता गर्न नहुने धारणा राखे। ती घटनाको गम्भीर मूल्याङ्कन बिना देशले सही बाटो समाउन नसक्ने उनको भनाइ छ ।

थापाले भविष्यमा राज्यको गोलीबाट कुनै नागरिकको ज्यान नजाने र हिंसात्मक तथा अराजक गतिविधि दोहोरिन नदिने वातावरण निर्माण गर्नुपर्नेमा जोड दिए। केही शक्तिहरूले विगतका घटनालाई अस्वीकार गर्ने प्रवृत्ति देखाएको आरोप लगाउँदै उनले ती दिनअघि सबै अवस्था सामान्य भन्ने तर्क भ्रमपूर्ण भएको दाबी गरे।

उनले वर्तमान राजनीतिक अवस्थालाई “फोहोर र प्रदूषित” भन्दै गठबन्धन संस्कृतिले समग्र प्रणाली नै प्रभावित पारेको टिप्पणी गरे। नेपाली कांग्रेस फरक सोच र स्पष्ट सङ्कल्पका साथ अघि बढेको उल्लेख गर्दै उनले आगामी पाँच वर्षभित्र राजनीति शुद्धीकरण गर्ने प्रतिवद्धता व्यक्त समेत गरेका हुन् ।

थापाले २०८२ देखि २०८७ सम्मको अवधिलाई देशका लागि “स्वर्णिमकाल” बनाउने लक्ष्यसहित कांग्रेस चुनावी मैदानमा उत्रिएको बताएका छन् ।

यसैबीच, थापाले मतदातालाई परिवर्तनको अभियानमा साथ दिन आह्वान गर्दै आगामी निर्वाचनलाई देशको भविष्य निर्धारण गर्ने महत्वपूर्ण अवसरका रूपमा चित्रित गरेका छन्।