स्पष्ट बहुमत ल्याउँछौं – जगदीश खरेल

काठमाडौं। राष्ट्रिय स्वतन्त्र पार्टी (रास्वपा) का उम्मेदवार जगदीश खरेलले आगामी फागुन २१ गते हुने निर्वाचनपछि पार्टीको एकलौटी सरकार बन्ने दाबी गरेका छन्।

सोमबार ललितपुरमा आयोजित घरदैलो कार्यक्रममा बोल्दै उनले रास्वपाले १५१ सिट जित्ने लक्ष्यसहित चुनावी मैदानमा उत्रिएको बताए। “यसपटक हामी स्पष्ट बहुमतसहित सरकार गठन गर्छौं,” उनले भने।

खरेलका अनुसार यो निर्वाचनले केवल सरकार र संसद गठन मात्र होइन, देशको भविष्य र दिशानिर्देश तय गर्ने ऐतिहासिक अवसर प्रदान गर्नेछ। उनले ललितपुरका तीनवटै निर्वाचन क्षेत्रमा रास्वपाको जित सुनिश्चित रहेको दाबीसमेत गरेका हुन् ।

सम्पदा संरक्षण आफ्नो पहिलो प्राथमिकता हुने उल्लेख गर्दै उनले ललितपुरको सांस्कृतिक र ऐतिहासिक धरोहर जोगाउन प्रतिबद्धता व्यक्तगरेका छन् । कार्यक्रममा ललितपुर महानगरपालिकाका रास्वपा सभापति ललित महर्जनले पनि पार्टीले अत्यधिक बहुमत ल्याउने विश्वास व्यक्त गरेका हुन् ।

निर्वाचन नजिकिँदै जाँदा राजनीतिक दलहरूको दाबी र प्रतिस्पर्धा तीव्र बन्दै गएको छ। फागुन २१ को मत परिणामले मुलुकको आगामी राजनीतिक यात्रा कता मोडिन्छ भन्ने स्पष्ट पार्नेछ ।