हरिबोल गजुरेलमाथि कारबाही फिर्ता नलिए पार्टी टुक्रिन सक्छ : झलनाथ खनाल

काठमाडौं । नेपाली कम्युनिस्ट पार्टी (नेकपा) भित्र आन्तरिक विवाद चर्किँदै गएको छ

नेता हरिबोल गजुरेललाई पार्टीबाट निष्कासन गर्ने निर्णयपछि वरिष्ठ नेता झलनाथ खनालले पार्टी नेतृत्वको कार्यशैलीप्रति गम्भीर असन्तुष्टि जनाउँदै पार्टी विभाजनको चेतावनी दिएका छन्।

सोमबार सामाजिक सञ्जालमार्फत सार्वजनिक धारणा राख्दै खनालले पार्टी संयोजक पुष्पकमल दाहाल ‘प्रचण्ड’ ले एकल र अधिनायकवादी ढंगले निर्णय लिएको आरोप लगाएका हुन् ।

उनले गजुरेलजस्ता अनुभवी र वरिष्ठ नेतालाई स्पष्टीकरणको अवसरसमेत नदिई निष्कासन गर्नु आश्चर्यजनक र अत्यन्तै कठोर कदम भएको बताएका हुन् ।

खनालका अनुसार पार्टी एकीकरणको घोषणा भएको लामो समय बितिसक्दा पनि विधिवत् नेतृत्वदायी समिति गठन हुन सकेको छैन। संस्थागत निर्णय प्रणाली विकास नहुँदा केही व्यक्तिको इच्छाअनुसार महत्वपूर्ण निर्णय हुन थालेको उनको भनाइ रहेको छ ।

पार्टीका अन्य घटक र नेताहरूलाई जानकारी नै नदिई सञ्चारमाध्यममार्फत कारबाही सार्वजनिक गर्नु पार्टीको विधि, पद्धति र संस्कार विपरीत भएको उनले उल्लेख गरेका छन्।

उनले गजुरेलमाथिको कारबाही तत्काल फिर्ता लिन र नेतृत्व तहका सबै नेताहरूको आकस्मिक बैठक बोलाउन संयोजक प्रचण्डसँग माग गरेका छन्। साथै, कारबाहीको कारणबारे पार्टीभित्र गम्भीर समीक्षा र खुला छलफल आवश्यक रहेकोमा खनालले जोड दिएका छन्।

पार्टीभित्र सामूहिक नेतृत्व र सामूहिक निर्णयको अभ्यास स्थापित गर्न नसके गम्भीर राजनीतिक दुर्घटना हुन सक्ने चेतावनी दिँदै खनालले भनेका छन्, “यदि यही शैली निरन्तर रह्यो भने पार्टी एकतामै प्रश्न उठ्न सक्छ।”

नेकपाभित्र बढ्दो असन्तुष्टि र सार्वजनिक रूपमा व्यक्त भएका चेतावनीहरूले पार्टीको भविष्य झनै अनिश्चित बन्दै गएको देखिन्छ।

अब नेतृत्वले विवाद समाधानतर्फ अग्रसर हुन्छ कि आन्तरिक द्वन्द्वले पार्टीलाई विभाजनतर्फ धकेल्छ भन्ने चासो राजनीतिक वृत्तमा बढ्दै गएको छ।