सर्लाहीमा ७ किलो गाँजासहित दुईजना पक्राउ, अनुसन्धान जारी

काठमाडौं । सर्लाही प्रहरीले अवैध लागूऔषध गाँजासहित दुई जनालाई पक्राउ गरेको छ।

आज मलङ्गवा नगरपालिका–७, गणेसिया चोकमा नियमित चेकजाँचका क्रममा ७ किलो ८०० ग्राम गाँजा बरामद गरिएको हो।

पक्राउ पर्नेमा कौडेना गाउँपालिका–१ का १९ वर्षीय निलेश मण्डल र चक्रघट्टा गाउँपालिका–३ का ३२ वर्षीय शेष मोफिज रहेका छन्।

प्रहरीले भारतीय नम्बरप्लेटको मोटरसाइकलमा सवार उनीहरूलाई रोकेर शोधपुछ गर्दा गाँजा सिटको भित्र लुकाएर ल्याएको फेला परेको बताइएको छ।

जिल्ला प्रहरी कार्यालयका प्रवक्ता एवं प्रहरी नायब उपरीक्षक सरोज राईका अनुसार, दुवै व्यक्तिविरुद्ध अवैध लागुऔषध मुद्दामा जिल्ला अदालतबाट पाँच दिनको म्याद लिएर अनुसन्धान सुरु गरिएको छ।

अनुसन्धान अझै जारी, प्रहरी अन्य संलग्न खोजीमा जुटेको छ।