मन्त्रिपरिषद्को निर्णय : अर्याल बने सरकारका नयाँ प्रवक्ता

काठमाडौं । सरकारले गृहमन्त्री ओमप्रकाश अर्याललाई सरकारको नयाँ प्रवक्ता तोकेको छ।

बिहीबार बसेको मन्त्रिपरिषद् बैठकले अर्याललाई प्रवक्ताको जिम्मेवारी दिने निर्णय गरेको हो।

यसअघि सरकारका प्रवक्ताको भूमिकामा रहेका सञ्चारमन्त्री जगदीश खरेलले पदबाट राजीनामा दिएपछि प्रवक्ता पद रिक्त रहेको थियो । उक्त रिक्त स्थान पूर्ति गर्दै सरकारले गृहमन्त्री अर्याललाई जिम्मेवारी सुम्पिएको हो।

सरकारका नीति, निर्णय र समसामयिक विषयमा अब औपचारिक जानकारी गृहमन्त्री अर्यालमार्फत सार्वजनिक गरिनेछ।

प्रवक्ता नियुक्तिसँगै सरकारका गतिविधि र निर्णयबारे जानकारी प्रवाह अझ व्यवस्थित हुने अपेक्षा गरिएको छ।