बायाँ खुट्टामा संक्रमणका कारण रवि लामिछाने टिचिङ अस्पतालमा उपचाररत

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने स्वास्थ्य उपचारका लागि त्रिभुवन विश्वविद्यालय शिक्षण अस्पताल, महाराजगञ्जमा भर्ना भएका छन्।

बायाँ खुट्टामा समस्या देखिएपछि उनलाई अस्पतालको हाडजोर्नी विभागमा मंगलबार भर्ना गरिएको हो।अस्पताल स्रोतका अनुसार केही समयदेखि औषधि सेवन गर्दा पनि अवस्था सुधार नदेखिएपछि थप परीक्षण र उपचारका लागि आज पनि अस्पतालमा राखिएका छन् ।

अस्पतालका प्रवक्ता डा. गोपाल सेडाईंका अनुसार लामिछानेलाई गत माघ ५ गते जनकपुरमा आयोजित एक कार्यक्रममा सहभागी हुने क्रममा बायाँ खुट्टामा चोट लागेको हो। सोही चोटका कारण पछि छालाको भित्री तहमा संक्रमण फैलिएको अस्पतालले जनाएको छ।

संक्रमण पुष्टि भएपछि उनलाई नशामार्फत एन्टिबायोटिक दिइँदै उपचार भइरहेको छ। अहिले उनको स्वास्थ्य अवस्था सामान्य रहेको र चिकित्सकहरूको निगरानीमा उपचार प्रक्रिया जारी रहेको अस्पतालले जानकारी गराएको छ।

लामिछानेको सचिवालयका अनुसार चिकित्सकको सुझावअनुसार उनी केही दिन अस्पतालमै बसेर उपचार गराउनेछन् ।चिकित्सकको निगरानीमा उपचार भइरहेको बताइए पनि पार्टी गतिविधिमा अस्थायी रूपमा विश्राम लिने तयारी गरिएको छ।