मतदान मिति नजिकिँदै, काठमाडौंमा त्रिस्तरीय सुरक्षा व्यवस्था कडा

काठमाडौं । फागुन २१ गते तय भएको प्रतिनिधिसभा निर्वाचनलाई ध्यानमा राख्दै काठमाडौं उपत्यकामा सुरक्षा व्यवस्था थप मजबुत बनाइएको छ ।

निर्वाचनलाई शान्त, निष्पक्ष र सुरक्षित रूपमा सम्पन्न गराउने उद्देश्यसहित सुरक्षा निकायहरूले संयुक्त सुरक्षा अभियान तीव्र पारेका छन् ।

जिल्ला प्रहरी परिसर काठमाडौंका अनुसार पछिल्लो समय नियमित गस्तीको संख्या बढाइएको छ भने नेपाली सेना, नेपाल प्रहरी र सशस्त्र प्रहरी बलको समन्वयमा राजधानीका संवेदनशील क्षेत्रहरूमा संयुक्त गस्ती भइरहेको छ । मुख्य चोक, भीडभाड हुने स्थान, होटल, लज तथा सार्वजनिक स्थलहरूमा कुकुरसहितको सुरक्षा जाँच (डग स्निफिङ) र आकस्मिक ‘सरप्राइज चेकिङ’ सञ्चालन गरिएको हो ।

सुरक्षा निकायहरूले सम्भावित जोखिमसँग सम्बन्धित सूचनाहरू संकलन गरी त्यसको विश्लेषणका आधारमा रणनीति तय गरिरहेको बताएका छन् । कुनै पनि अप्रिय घटना हुन नदिन निर्वाचन अवधिभर उच्च सतर्कता अपनाइने जनाइएको छ ।

काठमाडौं जिल्लामा कुल ३२० मतदानस्थल तोकिएका छन् । तीमध्ये १७६ वटा सामान्य र १४४ वटा संवेदनशील सूचीमा राखिएको छ । जिल्ला प्रहरी परिसरका अनुसार हालसम्म अतिसंवेदनशील मतदानस्थल भने पहिचान गरिएको छैन ।

निर्वाचन सुरक्षालाई प्रभावकारी बनाउन काठमाडौंमा मात्र ३ हजार ८५४ जना निर्वाचन प्रहरी परिचालन गरिएको छ । सुरक्षा निकायहरूले नागरिकलाई ढुक्क भएर मतदानमा सहभागी हुन आग्रह गर्दै निर्वाचन सफल बनाउन सबैको सहयोग आवश्यक रहेको जानकारी दिइएका हुन् ।

सुरक्षा व्यवस्था कडा बनाइएकै बीच सुरक्षा निकायहरूले निर्वाचनलाई भयमुक्त र विश्वासिलो बनाउने प्रतिबद्धता उल्लेख गरेका छन्  ।

उनीहरूले कुनै पनि शंकास्पद गतिविधि देखिए तत्काल नजिकको सुरक्षा निकायलाई जानकारी दिन नागरिकहरूलाई आग्रह गर्दै सुरक्षित र शान्तिपूर्ण निर्वाचन सम्पन्न गराउन सबै पक्षको सहकार्य आवश्यक रहेको हुँदा नागरिकबाट साथ सहयोग पाउने अपेक्षा गरेका  छन् ।