चलचित्र पत्रकार संघका पूर्वअध्यक्ष दिनेश सिटौलाको निधन

काठमाडौं । चलचित्र पत्रकार संघ नेपालका निवर्तमान अध्यक्ष दिनेश सिटौलाको निधन भएको छ।

काठमाडौंस्थित ग्राण्डी अस्पतालले आइतबार विज्ञप्ति जारी गर्दै उनको दिउँसो १२ बजेर ४५ मिनेटमा निधन भएको पुष्टि गरेको हो।

अछाममा बालेन्द्र शाह (बालेन) को चुनावी प्रचारमा सहभागी भइरहेका बेला एक्कासी बेहोस भएका थिए । अवस्था गम्भीर भएपछि नेपाली सेनाको हेलिकप्टरमार्फत उनलाई तत्काल काठमाडौं ल्याई ग्राण्डी अस्पतालमा भर्ना गरिएको हो।

अस्पतालका अनुसार सिटौलालाई गहन उपचार कक्षमा राखेर उपचार गरिए पनि ४८ घण्टासम्म उनको स्नायु प्रणालीमा कुनै सुधार देखिएन। चिकित्सकीय मापदण्डअनुसार गरिएको परीक्षणमा स्वतः श्वासप्रश्वास नदेखिएको र मस्तिष्कको कार्यक्षमता पुनःस्थापना हुने सम्भावना नरहेको निष्कर्ष निकालिएको अस्पतालले जनाएको छ।

उपचारको सम्पूर्ण प्रक्रिया र अवस्थाबारे परिवारलाई जानकारी गराइएपछि चिकित्सक टोलीले उनको निधन घोषणा गरेको अस्पतालको विज्ञप्तिमा उल्लेख छ।

चलचित्र पत्रकारितामा लामो समय योगदान दिएका सिटौलाको निधनले नेपाली पत्रकारिता क्षेत्र शोकमा डुबेको छ।

उनका सहकर्मी, शुभेच्छुक तथा विभिन्न क्षेत्रका व्यक्तिहरूले सामाजिक सञ्जालमार्फत श्रद्धाञ्जली व्यक्त गरिरहेका छन्।