रास्वपाको संघीय चुनावको तयारी तीव्र, ५१ सदस्यीय निर्वाचन सम्पादन समिति गठन

काठमाडौं । आगामी फागुनमा हुने प्रतिनिधिसभा सदस्य निर्वाचनलाई लक्षित गर्दै राष्ट्रिय स्वतन्त्र पार्टी (रास्वपा) ले संघीय निर्वाचन सम्पादन समिति गठन गरेको छ।

पार्टी उपसभापति डोलप्रसाद अर्यालको संयोजकत्वमा ५१ सदस्यीय समिति बनाइएको हो।

पार्टीका महासचिव कविन्द्र बुर्लाकोटीका अनुसार केन्द्रीय समितिको निर्णयअनुसार निर्वाचन केन्द्रित गतिविधिलाई प्रभावकारी रूपमा अघि बढाउन समिति गठन गरिएको हो। समितिको सदस्य सचिवको जिम्मेवारी शंकर श्रेष्ठलाई दिइएको छ।

रास्वपाले संघीय निर्वाचनलाई व्यवस्थित बनाउन प्रदेशगत रूपमा प्रदेश समन्वय सचिव तोकेको छ भने केन्द्रीय तहमा आन्तरिक समन्वय, प्रशासनिक समन्वय र सञ्चार समन्वयसम्बन्धी छुट्टाछुट्टै उपसमितिहरू पनि गठन गरेको जनाएको छ।

पार्टी नेतृत्वका अनुसार गठित समितिले निर्वाचन रणनीति, संगठनात्मक समन्वय र प्रचार–प्रसारलाई व्यवस्थित गर्दै प्रतिनिधिसभा निर्वाचनमा रास्वपाको भूमिकालाई अझ सक्रिय बनाउने लक्ष्य लिएको छ।

पार्टीले निर्वाचनको तयारीलाई संस्थागत रूपमा अघि बढाउने संकेत गर्दै संगठन सुदृढीकरण र समन्वयलाई प्राथमिकतामा राखेको देखिएको छ।