काठमाडौंमा दुई सातादेखि ग्यास संकट चर्कियो, नेपाल ग्यास अभावले उपभोक्ता हैरान

काठमाडौं । राजधानी काठमाडौँमा पछिल्लो दुई सातादेखि खाना पकाउने ग्यासको अभाव गहिरिँदै गएको छ।

बजारमा विशेषगरी नेपाल ग्यास नपाइएपछि सर्वसाधारण उपभोक्ता समस्यामा परेका छन्। भारतबाट समयमै ग्यास ढुवानी हुन नसक्दा आपूर्ति प्रभावित भएको र त्यसको प्रत्यक्ष असर उपभोक्तामा देखिएको हो।

नेपाल ग्यासका विक्री केन्द्रहरूमा लामो समयदेखि ग्यास उपलब्ध नहुँदा उपभोक्ता खाली सिलिन्डर बोकेर बालाजु औद्योगिक क्षेत्रस्थित नेपाल ग्यासको केन्द्रीय कार्यालयसम्म धाउन बाध्य छन्। तर कार्यालयसम्म पुगेका उपभोक्ताले पनि ग्यास नपाएको गुनासो गर्दै आएका छन्।

कार्यालयमा बिहानदेखि दिउँसो २ बजेसम्म मात्र ग्यास वितरण गरिने व्यवस्था रहेकाले सीमित समयमै सेवा लिन उपभोक्ताको लामो लाइन देखिने गरेको छ। दैनिक सयौँ उपभोक्ता लाइनमा बस्दा पनि ग्यास हात नपर्ने अवस्था सिर्जना भएको हाे।

यता, नेपाल ग्यास कम्पनीले ढुवानी प्रक्रियामा समस्या देखिएकाले आपूर्ति नियमित हुन नसकेको जनाएको छ। कम्पनीका अनुसार ढुवानी सहज भएसँगै समस्या समाधान हुने अपेक्षा गरिएको छ।

ग्यास अभावले दैनिक जीवन प्रभावित भइरहँदा उपभोक्ताले छिटो समाधानको माग गरेका छन्। सम्बन्धित निकायले समयमै आपूर्ति व्यवस्थापन नगरे समस्या अझ जटिल बन्दै जाने चेतावनी उपभोक्ताहरूले दिएका छन्।