भ्रामक प्रचारको विरोधमा राप्रपाको कडा कदम, साइबर ब्युरो र निर्वाचन आयोगमा उजुरी

काठमाडौँ । राष्ट्रिय प्रजातन्त्र पार्टी (राप्रपा) ले सामाजिक सञ्जालमार्फत फैलाइएको भ्रामक सामग्री र गलत प्रचारविरुद्ध साइबर ब्युरो तथा निर्वाचन आयोगमा औपचारिक उजुरी दर्ता गराएको छ।

पार्टीले जातीय सद्भाव बिगार्ने र भ्रम सिर्जना गर्ने उद्देश्यले केही फेसबुक अकाउन्टबाट अध्यक्ष राजेन्द्र लिङ्देनलाई लक्षित गरी आपत्तिजनक सामग्री सार्वजनिक गरिएको दाबी गरेको हो।

राप्रपा महामन्त्री राजेन्द्र गुरूङले साइबर ब्युरोमा बुझाएको निवेदनमा ‘हाम्रो पार्टी नेपाल मधेस’, ‘दलित भ्वाइसेस’, ‘नन्दु बिसी’ र ‘लोकेन्द्र बिसी’ नामका फेसबुक आइडीमार्फत भ्रामक पोस्ट गरेको उल्लेख गरेका छन् । उक्त पोस्टहरूमा अध्यक्ष लिङ्देनको तस्वीरसँगै गाईको तस्वीर प्रयोग गरी गलत सन्देश फैलाइएको भन्दै त्यसप्रति आवश्यक कानुनी कारबाहीको माग गरिएको हो।

यस्तै, ‘नेपाली टाइम्स’ नामक अनलाइन माध्यमले रूपन्देही–२, झापा लगायतका क्षेत्रमा एमाले र राप्रपाबीच समझदारी भएको भन्दै गरेको प्रचार तथ्यहीन र भ्रामक भएको राप्रपाको भनाइ छ। उक्त विषयमा निर्वाचन आचारसंहिता उल्लङ्घन भएको दाबी गर्दै पार्टीले निर्वाचन आयोगसमक्ष पनि निवेदन दिएको छ।

राप्रपाले लोकतान्त्रिक प्रक्रियामा भ्रम र गलत सूचना फैलाउने कुनै पनि गतिविधि स्वीकार्य नहुने स्पष्ट गर्दै सम्बन्धित निकायबाट निष्पक्ष छानबिन र कारबाही हुने विश्वास व्यक्त गरेको छ।