चितवन पुगे रवि लामिछाने

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने आज चितवन पुगेका छन्।

बिहीबार दिउँसो बुद्ध एयरको विमानमार्फत भरतपुर विमानस्थल अवतरण गरेका लामिछानेले चितवनमै विभिन्न धार्मिक तथा व्यक्तिगत कार्यक्रम तय गरेका हुन् ।

उनका स्वकीय सचिव अविनाश आचार्यका अनुसार लामिछानेले लंकुस्थित लक्ष्मीनारायण मन्दिरमा स्वस्तिशान्ति पूजा गर्ने कार्यक्रम छ। त्यसपछि भरतपुरको विशालचोकस्थित आफ्नै निवासमा गृहप्रवेशको कार्यक्रम राखिएको छ।

आगामी फागुन २१ गते हुने प्रतिनिधिसभा सदस्य निर्वाचनलाई लक्षित गरी घरदैलो तथा भेटघाट कार्यक्रम अघि बढाउन उनी चितवन आएका हुन्।

लामिछाने चितवन क्षेत्र नम्बर–२ बाट उम्मेदवार रहेका छन्। यसअघि जनकपुरको कार्यक्रममा सहभागी हुँदा खुट्टामा चोट लागेपछि त्रिवि शिक्षण अस्पतालमा उपचाररत रहेका उनी डिस्चार्जपछि केही दिन विश्राममा रहेका हुन् ।

स्वास्थ्यमा सुधार आएपछि उनी पुनः सक्रिय राजनीतिमा फर्किएका हुन्। लामिछाने यसअघि पनि सोही क्षेत्रबाट दुई पटक प्रतिनिधिसभा सदस्यमा निर्वाचित भइसकेका छन्।

निर्वाचन नजिकिँदै जाँदा चितवनमा राजनीतिक सरगर्मी थप बढ्ने संकेत देखिएको छ।