सेयर बजारमा हरियाली, नेप्से २७ अंक उकालो, कारोबार साढे ११ अर्ब नाघ्यो

काठमाडौँ । साताको अन्तिम कारोबार दिन नेपाली सेयर बजारले उत्साहजनक गति लिएको छ।

नेप्से परिसूचक बिहीबार दोहोरो अंकले उक्लिँदै २७ अंकभन्दा बढीको सुधार देखाएको हो। बजार १.०१ प्रतिशतले बढेर २ हजार ७०८.७० विन्दुमा पुगेको छ। चार कारोबार दिनपछि नेप्से फेरि २७ सयको मनोवैज्ञानिक विन्दु पार गर्न सफल भएको छ । यसअघि माघ १८ गते नेप्से २६ सय ९४ विन्दुमा झरेको हो।

आजको कारोबारमा २०१ कम्पनीको सेयर मूल्य बढ्दा ५५ कम्पनीको मूल्य घटेको छ भने,४ कम्पनी स्थिर रहेका छन् । अधिकांश कम्पनीको सेयर मूल्यमा वृद्धि देखिँदा समग्र बजार उकालो लागेको हो। कुल १ लाख ८ हजारभन्दा बढी पटकको कारोबारमा ३ करोड ५५ लाखभन्दा बढी कित्ता सेयर किनबेच भएका छन्। यसबाट ११ अर्ब ५८ करोड रुपैयाँभन्दा बढीको कारोबार भएको छ, जुन अघिल्लो दिनको तुलनामा उल्लेख्य वृद्धि छ ।

उपसमूहतर्फ हेर्दा व्यापारबाहेक सबै समूह हरियालीमा देखिएका छन्। व्यापार समूह भने १८ अंकभन्दा बढीले घटेको छ। सबैभन्दा बढी निर्जीवन बिमा र जीवन बिमा समूहमा उल्लेख्य वृद्धि देखिएको छ।

लगातारको सुधार र बढ्दो कारोबार रकमले सेयर बजारमा लगानीकर्ताको आत्मविश्वास फर्किँदै गएको संकेत देखिएको हो।आगामी दिनमा बजारको चाल कस्तो रहन्छ भन्ने चासो बढ्दै गएको छ।